دەنگ نێت

 

دەزگای ئاسایشی هەرێمی کوردستان دەربارەی کەیسی دەستگیرکردنی (ئارام حەسەن و  شەرمین عەلی) لەکەلار، راگەیەنراوێکی بڵاوکردەوە و دەڵێت: "دۆسیەی ناوبراوان هیچ پەیوەندیەکی بە کاری ڕۆژنامەوانی و رێکخراوەیی و ئازادی رادەربڕینەوە نییە".

 

لەراگەیەنراوەکەی دەزگای ئاسایشی هەرێم دا هاتوە: هەردو ناوبراوان بە فەرمانی دادوەری لێکۆڵینەوە بە ماددەی (٣٤١)ـی خراپ بەکارهێنانی دەسەڵات لە یاسای سزادانی عێراقی راگیراون، چونکە فەرمانبەری حکومەتن، دەشڵێت: "هۆکاری دەستگیرکردنەکەیان ڕوونە"، بەبێ ئەوەی وردەکاریی زیاتر بخەنەڕو.  

 

ئاماژەی بەوەشداوە لە ماوەی رابردودا خۆیان و پەڕاویان خراونەتە بەردەم دادوەری لێکۆڵینەوەی ئاسایش وتەیان لێوەرگیراوە.

 

دەشڵێت: "هەموو ڕێکارێکی یاساییان بۆ گیراوەتەبەر، دەزگای ئاسایش تەنها لایەنی جێبەجێکاری یاسایە".

 

بەوتەی خۆشیان، دوێنێ (٢ـی ئایار) رێکخراوی خاچی سوری نێودەوڵەتی بۆ ئاگاداربون لە دۆخی راگیراوان سەردانی گرتوخانەی ئاسایشیان کردوە و چاویان بەسەرجەم راگیراوان کەوتوە لە نێویشیاندا ئەو دو راگیراوە.