ده‌نگ نێت

 

دواى ئه‌وه‌ى به‌ڕێوبه‌رى وه‌به‌رهێنانى گه‌رمیان رایگه‌یاند كه‌ تۆڕى ئاوى پرۆژه‌ى لانه‌ ستى له‌ كه‌لار تاوه‌كو ئێستا له‌لایه‌ن به‌ڕێوبه‌رایه‌تى ئاوى كه‌لاره‌وه‌ وه‌رنه‌گیراوه‌، به‌ڕێوبه‌رى ئه‌و به‌ڕێوبه‌رایه‌تیه‌ش ده‌ڵێت: هۆكاره‌كه‌ى ئه‌وه‌یه‌ نازانین چى پێداویستیه‌ك له‌و پرۆژه‌یه‌ به‌كارهێنراوه‌.

 

هونه‌ر مه‌حمود، به‌ڕێوبه‌رى گشتى به‌ڕێوبه‌رایه‌تى وه‌به‌رهێنانى گه‌رمیان، له‌ میانه‌ى به‌رنامه‌ى رۆژێكى ترى رادیۆى ده‌نگدا رایگه‌یاند: به‌ڕێوبه‌رایه‌تى ئاوى كه‌لار تاوه‌كو ئێستا تۆڕى ئاوى پرۆژه‌ى لانه‌ ستى له‌ كه‌لار وه‌رنه‌گرتوه‌ته‌وه‌ و بۆشمان رۆننه‌بوه‌ته‌وه‌ هۆكاره‌كه‌ى چیه‌.

 

له‌به‌رامبه‌ردا، سامان ره‌حیم، به‌ڕێوبه‌رى به‌رێوبه‌رایه‌تى ئاوى كه‌لار، بۆ رادیۆى ده‌نگ وتى: له‌ هه‌ر پرۆژه‌یه‌كى نیشته‌جێبون پێویسته‌ راى ئێمه‌ وه‌ربگیرێت و سێت و دیزاینه‌كه‌ى ئاراسته‌ى ئێمه‌ بكرێت، له‌ سه‌رده‌مى پرۆژه‌ى لانه‌ ستى كه‌ له‌لایه‌ن نوسینگه‌ى راوێژكاریه‌وه‌ سه‌رپه‌رشتى ده‌كرا ئیشى ئێمه‌ ته‌نها به‌راوردكردنى كه‌ره‌سته‌كان بو.

 

ده‌شڵێت: هیچ به‌راوردكاریه‌كمان بۆ ئه‌و كه‌ره‌ستانه‌ نه‌كردوه‌ و ناشزانین چ بۆریه‌كى بۆ به‌كارهێنراوه‌ و شێواز و كوالێتیه‌كه‌ى چیه‌ و چۆنه‌، بۆیه‌ به‌ڕێوبه‌رایه‌تیمان ناچێته‌ ژێربارى پرۆژه‌یه‌ك كه‌ نه‌زانێت چى تێدا به‌كارهاتوه‌ به‌پێى ئه‌و دیزاینه‌ى بۆى په‌سه‌ند كراوه‌.

 

هێماى بۆئه‌وه‌شكرد: هۆكارى وه‌رنه‌گرتنى پرۆژه‌كه‌ له‌لایه‌ن به‌ڕێوبه‌رایه‌تیمانه‌وه‌ ئه‌وه‌یه‌.