ده‌نگ نێت

 

جێگری به‌ڕێوبه‌رى نه‌خۆشخانه‌ى فریاكه‌وتنى شه‌هید هه‌ژار له‌ كه‌لار ئاماژه‌ به‌ خراپی دۆخی نه‌خۆشخانه‌كه‌یان ده‌كات و ده‌ڵێت: ده‌بێت نه‌خۆش خۆی ده‌رمان بێنێت له‌گه‌ڵ خۆی دا.

 

دوێنێ کارمەندانی نەخۆشخانەی فریاكه‌وتنى شەهید هەژار لە کەلار گردبونەوە و ناڕەزایەتیان دەربڕی لە بەرامبەر ئەو کێشانەی  روبەڕویان بوه‌تەوە.

 

وەکخۆیان ئاماژەیان پێکردوە، گرفتی دەرمان و چارەسەرەی پزیشکی و نەبونی کارگوزار و پێنەدانی خواردن بەکارمەندانی تەندروستی هەیە.

 

رزگار لەتیف، جێگری بەڕێوبەری نەخۆشخانەکە، له‌وباره‌وه‌ بە  رادیۆی دەنگی وت: هەمو ئەو گرفتانەمان هەیە و هیچیشی چارەسەر نەکراوە.

 

وتیشی: دۆخی نه‌بونى دەرمان بە جۆرێکە كه‌ نەخۆش دەبێت بڕوات لە دەره‌وه‌ خۆی دەرمان بهێنێت و ئێمە چارەسەری بکەین، هه‌روه‌ك چەندین دەرمانی گرنگ نەماوە، ئه‌گەر کەسێک شکاوی هەبێت دەبێت خۆی بەشێک لە کەرەستەکان بهێنێت لەگەڵ خۆی.