دەنگ نێت

 

بەڕێوبەری نەخۆشخانەی گشتی کەلار  زانیاری لەبارەی بڵاوبونەوەی نەخۆشی هەوکردنی پەردەی مێشک لە نێو مناڵان دەخاتەڕو و دەڵێت: ٤ حاڵەت تۆمارکراوە.

 

د. حارس محەمەد، بەڕێوبەری نەخۆشخانەی گشتی کەلار، بە رادیۆی دەنگی وت: تاوەکو ئێستا لەگەرمیان ٤ توشبوی نەخۆشی هەوکردنی پەردەی مێشک لە مناڵاندا لەلامان تۆمارکراون و لە بەشی نەخۆشخانەی قەڵا بۆ چاودێری ورد و نەخۆشیە گواستراوەکان خەوێنراون و چاودێری دەکرێن.

 

وتیشی: گوماندەکرێت چەند توشبویەکی دیکەش هەبن.

 

لەبارەی هۆکاری نەخۆشیەکە و رادەی مەترسیەکەی، باسی لەوەکرد نەخۆشیەکە ڤایرۆسیە و نیشانە و لێکەوتەکانی جۆراوجۆرن و سەرئێشە و تا و کۆکە و سکچون و رشانەوەی لەگەڵدایە، هاوکات نەخۆشییەکی گوازراوەیە.

 

وەزارەتی تەندروستی هەرێم راگەیەنراوێکی لەبارەی بڵاوبونەوەی نەخۆشی هەوکردنی پەردەی مێشک لە مناڵاندا بڵاوکردەوە و بەوتەی خۆی لیژنەیەکی تایبەت بۆ بەدواداچونی زیاتر دەنێرێتە پارێزگاکانی سلێمانی و هەڵەبجە.

 

بەڵام بەڕێوبەری نەخۆشخانەی گشتی کەلار ئەوەی رەتکردەوە هیچ لیژنەیەک بۆ گەرمیان نێردرابێت و بەوتەی خۆی "ئاگاداری ئەو بابەتەش نین، بەڵام کۆبونەوەمان لەگەڵ پزیشکانی پسپۆڕی مناڵان کردوە کە ئامادەکاری پێویست بکرێت".

 

 

 

* وێنەکە لە پەیجی نەخۆشخانەی گشتی کەلار وەرگیراوە و پەیوەندی بە نەخۆشییەکەوە نییە