دەنگ نێت

 

پسپۆڕێکی بواری ژینگە دەڵێت: ئەو شەپۆلە بارانبارینانەی لەم دواییانە روی لە ناوچەی گەرمیان کرد، ئاماژەن بۆ کاریگەری و زیاتربونی گۆڕانکاری کەشوهەوا، کەمترین سودیشی بۆ زیادبونی ئاستی ئاوی ژێر زەوی هەیە.

 

عەبدولموتەڵیب رەفعەت، مامۆستای زانکۆی گەرمیان و پسپۆڕی بواری ژینگە، لە بەرنامەیەکی تایبەتی رادیۆی دەنگدا باسی لەوەکرد: گەرمیان بەهۆی خەسڵەتی تایبەتی خۆیەوە کە ناوچەیەکی وشکە، کاریگەری گۆڕانکاری کەشوهەوای تێدا خێراتر دەردەکەوێت.

 

وتیشی: ئەو چەند شەپۆلە بارانبارینەی لە سەرەتا و ناوەڕاستی ئەم مانگەدا رویان لە ناوچەکە کرد، دەرخەری گۆڕانکاری کەشوهەوای ناوچەکەن، چونکە پێشوتر لەم مانگانەدا باران بەو ئاستە زۆرە نەباریوە.

 

جەختی لەوەشکردەوە: ئەگەرچی رێژەیەکی زۆری باران باریوە، بەڵام کەمترین سودی بۆ زیاتربونی ئاستی ئاوی ژێرزەوی هەیە.

 

 ئەمەش لە کاتێکدایە لەم شەپۆلە بارانبارینەی دواییدا و لە رۆژانی ١١ بۆ ١٣ـی نیسان، لە کەلار (٢٨.٣) ملم و لە کفری (٥٣.٦) ملم باران باریوە.