دەنگ نێت

 

پرۆژەی چوار ریانی ساڵح ئاغا کە رێگەیەکی سەرەکیە و لۆدێکی زۆری لەسەرە، لەساڵی پارەوە دەستکراوە بەکارکردن تێیدا، بەڵام تائێستا تەواو نەبوە و بەسستی کارەکانی دەچێت و بوەتە هۆی بێزاریی شۆفێران. 

 

پرۆژەی چوار ریانی ساڵح ئاغا ـ پەروێزخان ـ خانەقین ـ سەنگەر، لە 20-12-2022 تێیدا دەست بەکارکردن کراوە. لەبارەی سست بەڕێوەچونی کارەکانی، بەڕێوبەری رێگاوبانی گەرمیان دەڵێت: ئەگەر گرفتی دارایمان بۆ دروست نەبێت بێگومان لەکاتی خۆیدا تەواو دەبێت. 

 

عەدنان خەلیل، بە رادیۆی دەنگی راگەیاند: کارەکانی سەرەتای پرۆژەکە چونکە پشکنینە بەشێوەیەکی سست دەڕوات، لەهەمانکاتیشدا باران بارین کاریگەری هەبوە لەسەر سست بونی پرۆژەکە، بەڵام تاڕادەیەک بەپێی ئەو پلانە دەڕوات کە بۆی دیاریکراوە. 

 

باسی لەوەشکرد: پرۆژەکە 600 ملیۆن دیناری بۆ تەرخان کراوە، ئەگەر گرفتی دارایی بۆ دروست نەبێت بێگومان لەکاتی خۆیدا تەواو دەبێت، بەپێچەوانەشەوە ئەگەر گرفتی دارایی بۆ دروست بو و شایستە داراییەکانی بەڵێندەر لەکاتی خۆیدا خەرج نەکرێت، پرۆژەکە دوادەکەوێت.

 

پرۆژەکە 200 رۆژ بۆ تەواو کردنی دانراوە، لە ئێستاشدا زیاتر لە 100 رۆژی رۆشتوە.