دەنگ نێت

 

پرۆژه‌یه‌كى یه‌كه‌ى نیشته‌جێبونی دیکە لە کەلار دروست ده‌كرێت له‌سه‌ر روبه‌رى 300 دۆنم زه‌وی، به‌ڕێوبه‌رى وه‌به‌رهێنانى گه‌رمیانیش ده‌ڵێت: ئه‌و پرۆژه‌یه‌ بۆ كارمه‌ندانى وه‌زاره‌تى ناوخۆ و تاقانەکانی ئەنفال و رۆژنامەنوسانن.

 

پرۆژەی شاری شکۆ کە لەلایەن کۆمپانیای دەشتی بەرلوت دروستدەکرێت، دەکەوێتە سەر رێگەی کەلار- ناحیەی رزگاری بەرامبەر پرۆژەی گاردینا، ئه‌م پرۆژه‌یه‌ خۆى له‌ 1258 یەکەی پێكدێت.

 

هونه‌ر مه‌حمود، به‌ڕێوبه‌رى گشتى به‌ڕێوبه‌رایه‌تى وه‌به‌رهێنانى گه‌رمیان بۆ رادیۆى ده‌نگ وتى: پرۆژەی شاری شکۆ بۆ كارمه‌ندانى وه‌زاره‌تى ناوخۆیه‌، هاوكات به‌ نوسراوى به‌ڕێوبه‌رایه‌تیمان و ره‌زامه‌ندى ئیدارەی گه‌رمیان 2 توێژی دیكه‌ش جێگه‌ كراوه‌ته‌وه‌ له‌ نێو ئه‌م پرۆژه‌یه‌ ئه‌ویش رۆژنامه‌نوسان و تاقانه‌كانى ئه‌نفالن.

 

وتیشى: ئه‌م پرۆژه‌یه‌ له‌سه‌ر روبه‌رى 300 دۆنم زه‌وی جێبه‌جێده‌كرێت.

 

هێماى بۆئه‌وه‌شكرد: هه‌مو رێكاره‌كانى مۆڵه‌تى ته‌واو بوه‌ ته‌نها بڕیارێكى ئه‌نجومه‌نى وه‌زیرانى ماوه‌ كه‌ بگه‌ڕێته‌وه‌.

 

له‌ باره‌ى نرخ و قیسته‌كانى پرۆژه‌كه‌وه‌ به‌ڕێبه‌رى گشتى وه‌به‌رهێنانى گه‌رمیان جه‌ختى له‌وه‌كرده‌وه‌: بۆ بابه‌تى نرخاندن و قیسته‌كانى تاوه‌كو ئێستا هیچ شتێك رون نیه‌ چونكه‌ به‌ رێكه‌وتنى به‌شداربوان و كۆمپانیا ئه‌بێت.