دەنگ نێت

 

دوای ئەوەی ژمارەیەک لەو کەسانەی کاری عەرەبانەچێتی و فرۆشتنی سەوزە و میوە دەکەن لەناوبازاڕی کەلار خۆپیشاندانیان کرد  بەهۆی رێگەنەدانیان بە کارکردن، سەرۆکی شارەوانی کەلار دەڵێت: رێکیان دەخەینەوە، کارێک دەکەین هەم هاوڵاتیان و هەم کاسبکارانیش مەغدور نەبن.

 

بەو هۆکارەی لیژنەی ئەمنی رێگەی وەستانیان لەناو بازاڕدا پێنادات، سەرلەبەیانی ئەمڕۆ ژمارەیەک لەو کەسانەی کاری عەرەبانەچێتی و فرۆشتنی سەوزە و میوە دەکەن، لەناوبازاڕی کەلار خۆپیشاندانیان کرد و بە ریزکردنی عارەبانەکانیان شەقامی سەرەکی ناوبازاڕیان بڕی.

 

ئەکرەم ساڵح، سەرۆکی شارەوانی کەلار، لەبارەی ئەو پرسەوە بۆ رادیۆی دەنگ وتی: لیژنەیەکمان هەیە بەناوی رێکخستن، گوێ لە داواکاری کاسبکار و هاوڵاتیش دەگرین، نزیکەی 300 کاسبکارمان لەبازاڕ هەیە، لەملاشەوە 200 هەزار هاوڵاتیمان هەیە، ئەبێت شتێک بکەین هیچ لایەکیان مەغدور نەبێت.

 

باسی لەوەشکرد: کۆمەڵێک عەرەبانەمان هەیە بەردەوام لەناوبازاڕدان، ئەمەش گلەی خەڵکی لێکەوتوەتەوە.

 

وتیشی: رێکیان دەخەینەوە، شوێنێکمان بۆ میوە فرۆشەکان و چین و توێژەکانی تر دیاری کردوە و ئێوارانیش کاتژمێرێک پێش خۆرئاوابونمان دیاریکردوە ئەوەی کوێیان پێ باشبێت لەوێ بوەستن.