دەنگ نێت

 

ئه‌و پرۆژه‌ نیشته‌جێبوانه‌ى كه‌ له‌ قه‌زاى كه‌لار دروست ده‌كرێن كڕین و فرۆشتنیان پێوه‌ده‌كرێت به‌بێ ئه‌وه‌ى فه‌رمانى مۆڵه‌تی کۆتاییان گه‌ڕابێته‌وه‌.

 

لەئێستادا مامەڵەی کڕین و فرۆشتن بە ٤ پرۆژەی نیشتەجێبونی نوێ لەکەلار لەناو هاوڵاتیاندا دەکرێت کە بریتین لە: پرۆژەی پشتێنەی کەلار، پرۆژەی سەر روباری سیروان، هەردو پرۆژەی چەمی گازینۆ و بەردەسور، لە کاتێکدا ئەو پرۆژانە هیچیان کۆتا مۆڵەت و فەرمانیان لە ئەنجومەنی وەزیران نەگەڕاوەتەوە بۆ دەستپێکردنیان.

 

به‌ڕێوبه‌رى گشتى به‌ڕێوبه‌رایه‌تى وه‌به‌رهێنانى گه‌رمیان، لە لێدوانی دا بۆ رادیۆى ده‌نگ، دانی بەوەدانا کە هێشتا فەرمانی کۆتایی پرۆژەکان دەرنەچوە.

 

هونەر مەحمود، وتى: پرۆژه‌ نوێیه‌كان كه‌ له‌ قه‌زاى كه‌لار ئه‌نجام ده‌درێن هه‌مو رێكاره‌كانى وه‌رگرتنى مۆڵه‌تى ته‌واو بوه‌ چ له‌ ته‌رخانكردنى زه‌وى و چ له‌ وه‌رگرتنى راى لایه‌نه‌كان چ له‌ ماسته‌رپلان، ئه‌وه‌ى ماوه‌ته‌وه‌ ته‌نها بڕیارێكى ئه‌نجومه‌نى باڵاى وه‌به‌رهێنانه‌ كه‌ فه‌رمانه‌كه‌ى ده‌ربكات و ئێمه‌ واژۆى بكه‌ین.

 

ئەمەش لەکاتێکدایە کە لەئێستاوە و پێش دەستکردن بەو پرۆژانە، کڕین و فرۆشتن تیایاندا دەستیپێکردوە و لەناو بازرگانانی عەقاراتیش بانگەشە و ریکلامی کڕین و فرۆشتنیان دەکرێت.

 

لەبارەی ئەوەی ئەم کارە تاچەند یاساییە، هونەر مەحمود وتی: به‌پێى یاسا و رێنماییه‌كانى وه‌به‌رهێنان، كڕین و فرۆشتن قه‌ده‌غه‌یه‌ پێش ئەوەی پرۆژەکە دەستپێبکات.

 

بەوتەی خۆیشی، ئه‌وه‌ی هه‌یه‌ زۆرتر ناوتۆماركردن و حجزكردنی یەکەکانە، بەوپێیەی ئەو پرۆژانه‌ بازرگانین نەک پرۆژەی چین و توێژەکان بن کە بە تیروپشک و ناوهاتنەوە دابەش دەکرا.