دەنگ نێت

 

بەڕێوبەری گشتی شارەوانیەکانی گەرمیان دەڵێت چاوەڕێی رێنماییەکانی وەزارەتی شارەوانین بۆ پێکهێنانی ئەنجومەنی شارەوانی سەرجەم شارەوانیەکانی سنورەکە.

 

بەرزان کەریم، بەڕێوبەری گشتی شارەوانیەکانی گەرمیان، رەتیدەکاتەوە هیچ کارێک بۆ پێکهێنانی ئەنجومەنی شارەوانی  ناحیەکان و لەنێویشی دا ناحیەی رزگاری وەکو گەورەترین ناحیەی سنورەکە کرابێت.

 

جەختی لەوەشکردەوە: ئەوان لە رێگەیی ئیدارەی گەرمیانەو دوای ڕونکردنەوەیان کردوە لە وەزارەتی شارەوانی، چونکە بۆ پێكهێنانی ئەنجونەمەکە کۆمەڵێک رێنمایی هەیە و لای ئەوان نیە.

 

سەرجەم ئەو ئەنجومەنانەی لە شارەوانیە جیاوازەکانی سنوری گەرمیان هەن هی ساڵی ٢٠٠٥ـن و تاوەکو ئێستا ئەنجومەنی نوێ پێکنەهێنراوە.

 

ئەنجومەنی وەزیرانی هەرێمی کوردستان لە ساڵی 2019 پەیڕەوێکی دەرکرد بەناوی 'پەیڕەوی ژمارە (2)ـی ساڵی 2019 سەرۆکایەتی ئەنجومەنی وەزیران پەیرەوی پێکهێنانی ئەنجومەنەکانی شارەوانی لە هەرێمی کوردستان'، کە تیایدا لە بری پێشتر کە بە هەڵبژاردن ئەنجومەنی شارەوانییەکان دیاریی ده‌کران، ئەمجارە بە دانانی راستەوخۆ ئەنجومەنەکە پێکدەهێنرێت، کە (75%)ـى له‌ بەرپرسانی فەرمانگە خزمەتگوزارییەکانن و (25%)ـى بۆ رێكخراوه‌ مه‌ده‌نی و پیشه‌ییه‌كانه‌، به‌ كۆمه‌ڵێك مه‌رج و رێنمایی.