دەنگ نێت

 

باوکی مناڵێک کە نەخۆشی ئیفلیجی مێشکی هەیە داوا لە دەسەڵاتداران دەکات هاوکاری بکەن بۆ وەرگرتنی ڤیزا بەمەبەستی بردنی مناڵەکەی بۆ نەخۆشخانەکانی دەرەوە، دەشڵێت: پارەم لێتان ناوێت.

 

عەبدولڕەحمان عەبدوڵڵا، باوکی مناڵێکی تەمەنی ٩ ساڵە کە نەخۆشی ئیفلیجی دەماغی هەیە، بۆ رادیۆی دەنگ وتی: مناڵەکەم لەزکماکیەوە وایە، پێشتر بردومەتە هیندستان و وتویانە دەبێت بمێنیتەوە تا شەش مانگ، بەڵکو دەرەنجامێکمان دەستکەوێت، بەڵام نەمتوانی بمێنمەوە، لەبەرئەوەی دڵنیانەبون لە چارەسەرییەکە و هەروەک ئەوکاتیش باری دارایم خراپ بو و مناڵی دیکەم هەبو پێویست بو بگەڕێمەوە.

 

وتیشی: کەگەڕامەوە لیژنەیەکی پزیشکی مناڵەکەمی بینی و چوار پزیشک ئیمزایان لەسەر راپۆرتێک کردوە کە لە سەنتەرێکی پێشکەوتودا مناڵەکەم چارەسەری هەیە.

 

باسی لەوەشکرد، چەند سەنتەرێکی پێشکەوتوی پزیشکییان لە چەند وڵاتێکی ئەوروپیدا دۆزیتەوە، وەک: نەمسا و ئەڵمانیا.

 

عەبدولڕەحمان، وتیشی: لە ئێستادا کێشەی ماددیم نیە، خۆشم پارەم نەبو خێرخواز ئەیگرێتە ئەستۆی خۆی، کێشەی من تەنها ڤیزایە بۆ ئەوەی ئەو مناڵەی پێ ببەین بۆ یەکێک لەو وڵاتانە و چارەسەری بکەن.

 

داواشی لە دەسەڵاتداران لە حیزب و حکومەت کرد کە ئەو جگە لە دابینکردنی ڤیزا، هیچی دیکەی لێیان ناوێت، خوازیاریشە بەدەمیەوە بێن و هاوکاری بن لە چارەسەربونی مناڵەکەی و کۆتاییهاتن بەو ئازارەی کە بەوهۆیەوە دەیکێشن