ده‌نگ نێت

 

بۆماوه‌ى 13 رۆژه‌ 6 ئۆتۆمبێلى بارهه‌ڵگرى هاوڵاتیانى هه‌رێم له‌ مه‌رزى په‌روێزخان له‌ دیۆى ئێرانه‌وه‌ ده‌ستیان به‌سه‌ردا گیراوه‌ به‌ هۆكارى ئه‌وه‌ى بارى قاچاخیان باركردوه‌، به‌ڕێوبه‌رى مه‌رزى په‌روێزخانیش ده‌ڵێت: دۆسیه‌كه‌ له‌ دادگایه‌. 

 

گه‌یلان ئه‌حمه‌د، شۆفێرى یه‌كێك له‌و ئۆتۆمبێله‌ بارهه‌ڵگره‌ ده‌ستبه‌سه‌ردا گیراوانه‌ى له‌ مه‌رزى نێوده‌وڵه‌تى په‌روێزخان، بۆ رادیۆى ده‌نگ وتى: "6 ئۆتۆمبێلمان بۆ ماوه‌ى 13 رۆژه‌ له‌ دیوى ئێرانه‌وه‌ ده‌ستى  به‌سه‌رداگیراوه‌ به‌ هۆكارى ئه‌وه‌ى بارى قاچاخمان باركردوه‌ له‌ ئێرانه‌وه‌". 

 

وتیشی: ئێمه‌ وه‌ك هه‌مو جارێك بارمان له‌ مه‌رزه‌كه‌وه‌ "دیوی ئێران" باركردوه‌، به‌ڵام دواتر ده‌ستى به‌سه‌ردا گیراوه‌ و وتراوه‌ قاچاخه‌ و نه‌مانزانیوه‌ كه‌ باره‌كه‌ قاچاخه‌.

 

وتیشى: به‌رپرسانى مه‌رزى په‌روێزخان له‌ كێشه‌كه‌ ئاگادارن، به‌ڵام ئومێدێكیان پێنه‌داوین له‌سه‌ر به‌ربونى ئۆتۆمبێله‌كانمان. 

 

له‌ به‌رامبه‌ردا، عه‌باس ئیسماعیل، به‌ڕێوبه‌رى ده‌روازه‌ى نێوده‌وڵه‌تى په‌روێزخان، به‌ رادیۆى ده‌نگى راگه‌یاند: بۆ ئه‌و بابه‌ته‌ له‌سه‌ر هێڵین و كۆبونه‌وه‌شمان كردوه‌ له‌گه‌ڵ به‌رپرسانى مه‌رز كه‌ ئه‌و ئۆتۆمبێلانه‌ له‌ دیوى ئێرانه‌وه‌ راگیراون و گفتوگۆمان له‌باره‌یانه‌وه‌ كردوه‌، به‌ڵام دۆسیه‌كه‌یان له‌ لێكۆڵینه‌وه‌یه‌ له‌ دادگاى قه‌سرى شرین. 

 

وتیشى: ده‌بێت چاوه‌ڕێبكه‌ین بڕیارى دادگا چى ده‌بێت، ره‌نگه‌ له‌ چه‌ند رۆژى داهاتو ئه‌و ئۆتۆمبێلانه‌ به‌ربن.