ده‌نگ نێت

 

به‌ڕێوبه‌رى گشتى به‌نداوه‌كانى هه‌رێم ده‌ڵێت: به‌نداوى به‌رده‌سور یه‌كێكه‌ له‌ به‌نداوه‌ ستراتیژیه‌كانى گه‌رمیان و له‌ ئێستادا دیزاینى به‌نداوه‌كه‌ ته‌واو بوه‌ و له‌ پلاندا هه‌یه‌ له‌ بودجه‌ى عێراقدا جێگه‌بكرێته‌وه‌ بۆ ده‌ستكردن به‌ دروستكردنى.

 

ره‌حمان خانى، به‌ڕێوبه‌رى گشتى به‌نداوه‌كانى هه‌رێم له‌مباره‌یه‌وه‌ به‌ رادیۆى ده‌نگى راگه‌یاند: به‌نداوى به‌رده‌سور كارى باشى تێداكراوه‌ و دیزاینه‌كه‌شى ته‌واو بوه‌، له‌گه‌ڵ ئه‌وه‌شدا به‌ نوسراوى فه‌رمى ئاراسته‌ى وه‌زاره‌تى پلاندانانى عێراق كراوه‌ به‌مه‌به‌ستى ته‌رخان كردنى بودجه‌ بۆى، به‌ڵام تاوه‌كو ئێستا نه‌مانتوانیوه‌ له‌ بودجه‌ى عێراقدا جێگه‌ى بكه‌ینه‌وه‌.

 

جه‌خت له‌وه‌شكرده‌وه‌: ئه‌و به‌نداوه‌ توانى گلدانه‌وه‌ى  نزیكه‌ى 170 ملیۆن مه‌تر سێجا ئاوى هه‌یه‌.

 

باسى له‌وه‌شكرد: ئه‌م به‌نداوه‌‌ به‌ دروست كردنى سودێكى زۆرى بۆ ناوچه‌ى گه‌رمیان ده‌بێت به‌تایبه‌ت كه‌رتى كشتوكاڵى و دانه‌وێڵه‌، به‌ڵام به‌مه‌رجێك پرۆژه‌ ئاودێریه‌كانى له‌گه‌ڵدا ته‌واو بكرێت.