دەنگ نێت

 

دوای ئەوەی رادیۆی دەنگ چەند وێنەیەکی روباری سیروانی لە کەلار بڵاوکردوە و تێیدا دەرکەوتبو ژینگەی روبارەکە بە فڕێدانی خۆڵوخاشاک و پاشماوەی بیناسازی پیس کرابو، بەڕێوبەری فەرمانگەی ژینگە دەڵێت: بەدواداچون دەکەین، سەرۆکی شارەوانی کەلاریش دەڵێت: روبارەکە پاکدەکرێتەوە.

 

بەپێی چەند وێنەیەک کە پەیجی رادیۆی دەنگ لە فەیسبوک بڵاویکردوەتەوە، دەرکەوتوە روبارەکە خۆڵ و خاشاک و پاشماوەی بیناسازی فڕێدراوەتە ناوی و ژینگەکەی پیس کراوە.

 

ئەکرەم ساڵح، سەرۆکی شارەوانی کەلار، لەوبارەوە بۆ رادیۆی دەنگ وتی: ئەو خۆڵ و خاشاکە ئەگەر لە رابردو تێیکرابێت یان ئێستا، هەموی پاک دەکرێتەوە و چاڵوچۆڵیەکانی روبارەکەش پڕدەکرێتەوە، بەڵام جارێک با پرۆژە وەبەرهێنانەکەی سەر روبارەکە (زۆنەکان) بە تەواوی دەست بەکارەکانی بکات.

 

وتیشی: نازانین کۆمپانیای جێبەجێکاری پرۆژەی سەر روباری سیروان ئەو خۆڵ و خاشاکەی رشتوە یان نا، بەڵام چاوەڕێین بە تەواوەتی دەست بەکارەکانی بکات، ئەوکات تیمی ئێمە چاودێریی روبارەکە دەکات.

 

هاوکات لەسەر ئەم بابەتە، بەڕێوبەری فەرمانگەی ژینگەی گەرمیان، دەڵێت: ئێمە لیژنەیەکی خۆمان هەیە بۆ چاودێریکردنی تەواوی پرۆژەکان، لەهەرشوێنێک سەرپێچی هەبێت، راستەوخۆ لێپێچینەوەی خۆمان دەکەین.

 

د. دورەید سەلیم، بۆ رادیۆی دەنگ، وتیشی: هەندێک گۆماومان هەیە لە نزیک روباری سیروان پیسی تێچوە، بەڵام نەچوەتە نێو رێڕەوی روبارەکە.