دەنگ نێت

 

بەڕێوبەری گشتی کشتوکاڵی گەرمیان دەڵێت: هێشتا مەترسی وشکەساڵی لەسەر بەروبومی دانەوێڵەی سنورەکە بونی هەیە.

 

شادیە حسێن، بە رادیۆی دەنگی وت: بۆ ئەمساڵ وەک ئاوی ژێر زەوی و لەوەڕگا مەترسی وشکەساڵیمان تێپەڕاندوە، بەڵام وەک بەروبومی دانەوێڵە ئەوا جارێک ماوە، لەبەر ئەوەی تا مانگی نیسان پێویستمان بەبارانە، ئەگەر تا ئەو کاتە بارانی باش و هاوسەنگ نەبارێت، ئەوە رەنگە نەتوانین وەکپێویست بەربومی دانەوێڵە هەڵبگرین.

 

وتیشی: بەشێوەیەکی هاوسەنگ بۆ تێپەڕاندنی وشکەساڵی بە گشتی، پێویستمان  بە بارینی ٢٥٠ ملم باران هەیە لە مانگی ١١ تاوەکو مانگی ٤.

 

تائێستا لە کەلار ١٦٤ ملم، لە کفری ١٨٧ ملم و لە خانەقی ١٥٤.٤ ملم باران باریوە، هەروەک لە مەیدان ٢٦٣ ملم و لە باوەنوریش ٢٢٠ ملم باران باریوە.

 

لەبارەی ئەوەی بۆ ئەمساڵ چەند دۆنم زەوی دەیم چێندراوە بە بەروبومی دانەوێڵە، بەڕێوبەری گشتی کشتوکاڵی گەرمیان هێمای بۆ ئەوەکرد: لە ئێستادا ئامارێک بەردەست نیە لەوبارەیەوە، بەڵام کار لەسەر ئەوەدەکەین کە ناوی جوتیارەکان تۆماربکەین لەگەڵ دۆنمی زەویەکانیان.