دەنگ نێت

 

دوای خۆپیشاندانی ژینگەپارێزەکانی نەخۆشخانەکانی گەرمیان، بەرپرسێکی تەندروستی دەڵێت: دڵنیاییمان پێدراوە لە خەرج کردنی موچەکانیان لە هەفتەی داهاتودا.

 

لە سەرەتای ئەم هەفتەیەوە نزیکەی ١٣٠ ژینگەپارێزی تەندروستی گەرمیان خۆپیشاندانیان کرد، بەوهۆیەی موچەی ٣ مانگیان لای کۆمپانیایە و بۆیان خەرج ناکرێت، ئەمەش بەهۆی خەرجنەکردنی شایستە داراییەکانی کۆمپانیاکە لەلایەن حکومەتەوە.

 

لایخۆشیەوە د. حارس محەمەد، بەڕێوبەری نەخۆشخانەی گشتی کەلار، بە رادیۆی دەنگی وت: ئەنجومەنی وەزیران واژۆی لەسەر خەرجکردنی پارەکە کردوە و بۆ وەزارەتی دارایی نێردراوە و لەوێشەوە رەزامەندی لەسەر دراوە و دەنێردرێتە بەڕێوبەرایەتی گشتی تەندروستی گەرمیان بۆ خەرجکردنی پارەکانیان.

 

جەختی لەوەشکردەوە، بڕیارە هەفتەی داهاتو پارەکە خەرج بکرێت، بەوهۆیەشەوە ژینگەپارێزان مانگرتنەکەیان بەکۆتاهێناوە.

 

پێشتریش بەڕێوبەری گشتی تەندروستی گەرمیان بە رادیۆی دەنگی وتبو: بۆ کاری پاککردنەوەی نەخۆشخانەکانمان گرێبەستمان لەگەڵ کۆمپانیایەک هەبو هەتا رێکەوتی ٣١ـی ١ـی ٢٠٢٣، ئێستا گرێبەستەکەیان تەواو بوە، بەڵام کرێکارەکانمان هێشتوەتەوە و بەشێوەی جێبەجێکردنی راستەوخۆ (تنفیذ مباشر) موچەیان پێدەدەین تا ئەو کاتەی تەندەر بۆ کۆمپانیایەک دەردەچێت.