ده‌نگ نێت

 

بۆ ماوەی زیاتر لە 2 مانگە خواردن بۆ نەخۆشخانەکانی گەرمیان دابین ناکرێت بەھۆی خەرج نەکردنی پارە بۆ کۆمپانیاکان، جێگری بەرێوبەری نەخۆشخانەی گشتی کەلاریش دەڵێت: ئەو گرفتە بەردەوامی ھەیە و داوامان کردوە قەرەبوی مادی کارمەندانمان بکرێتەوە.

 

ئه‌ركان محەمەد رەشید، جێگری بەڕێوبەری نەخۆشخانەی گشتی کەلار، لەمبارەیەوە بۆ رادیۆی دەنگ دەڵێت: کێشەی دابین نەکردنی خواردن بۆ کارمەندانی تەندروستی و بەشی ئێشکگریمان بەردەوامی ھەیە و تاوەکو ئێستا چارەسەر نەکراوە، ھۆکارەکەشی خەرج نەکردنی پارەیە بۆ کۆمپانیاکانی ئامادەکردنی خواردن.

 

وتیشی: داوامان کردوە قەرەبوی مادی کارمەندان بکرێتەوە، چونکە بۆ ماوەی چەند مانگێكە لەسەر حسابی خۆیان خواردن دەکڕن و ئامادەی دەکەن.

 

جەختی لەوەشکردەوە: تاوەکو ئێستا وەڵامی ئەو داواکاریەمان نەدراوەتەوە لەسەروی خۆمانەوە.

 

پرۆسه‌ى دروستكردنى خواردن بۆ ستافی ئێشكگرى نه‌خۆشخانه‌كانى گه‌رمیان پێشتر له‌لایه‌ن كۆمپانیایه‌وه‌ به‌ڕێوه‌ده‌برا، دواتر كۆمپانیاكه‌ ده‌ستبه‌ردارى كاره‌كه‌ى بو و سپێردرا به‌ چێشتخانه‌یه‌ك كه‌ رۆژانه‌ خواردنى بۆ ناوه‌نده‌ ته‌ندروستییه‌كان دابین ده‌كرد، به‌ڵام به‌هۆی پێنه‌دانى شایسته‌ داراییه‌كانییه‌وه‌، چێشتخانه‌كه‌ش ماوه‌ى 2 مانگه‌ خواردن به‌ نه‌خۆشخانه‌كان نادات و ئه‌و ناوه‌ندانه‌ به‌بێ خواردن ماوه‌نه‌ته‌وه‌ و كارمه‌ند و ستافه‌ ئێشككگره‌كان له‌سه‌ر حسابی خۆیان خواردن دابین ده‌كه‌ن.