دەنگ نێت

 

لە دژی وەبەرهێنەری جێبەجێکاری پرۆژەکەیان، دانیشتوانی گەڕەکی کەلاری نوێ گردبونەوەیان کرد و دەڵێن خزمەتەکانی تەواو نەکردوە و کەچی داوای قیستی کۆتایی دەکات، داواش دەکەن پرۆژەکە لەو وەبەرهێنە وەربگیرێتەوە.

 

کامەران عەلی، نوێنەری دانیشتوانی گەڕەکی کەلاری نوێ کە بە تابلۆ سیتی-ش ناودەبرێت، بە رادیۆی دەنگی وت: کۆمپانیاکە داوای قیستی شەشەم دەکات بەبێ ئەوەی خزمەتگوزارییەکانی تەواو کردبێت، تائێستا نە قوتابخانەی هەیە نە محەویلەی کارەباکان تەواوکراون و تەنها بنکەی تەندروستییەکەی تەواو کردوە.

 

ئاماژەی بەوەشکرد: وەبەرهێنەکە دوای ئەوەی کە لە دادگا سکاڵای تۆمارکرد، دادگا بڕیاری لە بەرژەوەندی دانیشتوانەکە بو، دواتر تانەی لە بڕیارەکەی دادگا دا و لە دادگای تەمیزی گەرمیانیش هەر لە بەرژەوەندی ئێمە بڕیار درا، ئێستا دەیەوێت لە دادگای هەولێر جارێکی تر تەمیزی بکاتەوە.

 

وتیشی: ئێمەش دژ بەو هەنگاوە و بە وەبەرهێنەکە ئەمڕۆ گردبونەوەمان لەبەردەم دادگا و داواکاری گشتی گەرمیان کرد.

 

نیگەرانی خۆیشی پیشاندا لەوەی بەڕێوبەرایەتی گشتی وەبەرهێنانی گەرمیان پشتگیری وەبەرهێنەکە دەکات لەکاتێکدا بە وتەی خۆی پرۆژەکەی تەواو نەکردوە و پڕی لە کەموکورتییە. داوایشی کرد کە پرۆژەکە لە وەبەرهێنەکە وەربگیرێتەوە.

 

رادیۆی دەنگ بۆ وەرگرتنی قسەی ئەوان، پەیوەندی بە وەبەرهێنەری پرۆژەی کەلاری نوێوە کرد، بەڵام پەیوەندییەکەی بەردەست نەبو.