دەنگ نێت

 

وتەبێژی پۆلیسی گەرمیان ئاشکرای کرد؛ تۆمەتباری کوشتنی گەنجەکەی کەلار خۆی رادەستیان کردوە و لێکۆڵینەوەی لەگەڵدا دەکرێت.

 

عەلی جەمال، بە رادیۆی دەنگی وت: ئەمڕۆ ئەو گەنجەی کە تۆمەتبارە بە کوشتنی گەنجێک لە نزیک قەڵای شێروانە لە هەفتەی رابردودا و فەرمانی دەستگیرکردنی هەبو، خۆی رادەستکردوە.

 

رۆژی 25ـی ئەم مانگە نزیک بە قەڵای شێروانە لە کەلار، گەنجێک بەناوی: داود سلێمان حەیان، تەمەن 31 ساڵ، لەناو ئۆتۆمبیلێکەوە تەقەی لێکرا و پێکرا، لە رێگای گەیاندنی بە نەخۆشخانەی سلێمانی، گیانی لەدەستدا. 

 

لەسەر ئەم روداوە پۆلیس ٦ کەسی دەستگیر کردبو و فەرمانی گرتنیش لەلایەن دادوەرەوە  بۆ سیانی دیکە دەرچوبو کە یەکێکیان ئەو گەنجەیە کە ئەمڕۆ خۆی رادەستکرد و بە بکەری تاوانەکە تۆمەتبار کرابو.