دەنگ نێت

 

کارگێڕی و مامۆستایانی خوێندنگەی ئیبراهیم ئەحمەد لە رونکردنەوەیەکدا لەسەر هەواڵێکی رادیۆی دەنگ دەڵێن: هیچ بڕە پارەیەکمان لە خوێندکاران وەرنەگرتوە بۆ چاککردنی پۆلەکانیان.

 

دەقی رونکردنەوەکە:

 

ڕوونکردنەوە 

 

(ڕادیۆی دەنگ) هەواڵێکی بڵاوکردووەتەوە لەبارەی کۆکردنەوەی پارە لە خوێندکارانی خوێندنگەکەمان (ئامادەیی ئیبراهیم ئەحمەد لە کەلار) کە بەداخەوە بەشێوەیەک داڕێژراوە وەک ئەوەی ئێمەی کارگێڕی و مامۆستایان پارەمان لە خوێندکاران وەرگرتبێت!

 

هەربۆیە بۆ هەموو لایەکی دەخەینەڕوو کە وەکو دەستەی کارگێری و سەرجەم مامۆستایانی خوێندنگەکەمان تەحەددا دەکەین هیچ بڕە پارەیەک لە هیچ خوێندکارێک لەلایەن ئێمەوە وەرگیرابێت بۆ چاککردنی پۆلەکان، بەڵکو خوێندکاران لەسەر داوا و ئەرکی خۆیان هەستاون بەو کارە و ئەمەیش کارێکی ئەخلاقی جوانەو جێگای دەستخۆشیە لەو خوێندکارە ئازیزانە کە هەست بە بەرپرسیارێتی دەکەن. هەر ڕۆژنامەنووس و کەسێکیش کە دەیەوێت ئەم هەواڵە پشتڕاست بکاتەوە، دەتوانێت سەردانی خوێندنگاکەمان بکات و ڕای سەرجەم خوێندکاران بە شێوەیەکی ئازادانە وەربگرێت لەسەر ئەو بابەتە.

 

سەبارەت بە پاککردنەوەی خوێندنگەیش، دەستەی کارگێڕی و لیژنەی پەرەپێدان و ڕابەرانی پۆل هەستاون بەدابەشکردنی خوێندکاران بەسەر چەند گروپێکدا بۆ پاککردنەوەی پۆلەکانی خۆیان، چونکە یەک کارگوزارمان هەیەو فریای هەموو پۆلەکان ناکەوێت کە ژمارەی خوێندکارەکانمان نزیک دەبێتەوە لە (٨٠٠) خوێندکار‏ و ژمارەی پۆلەکانیشمان (٢١) پۆلە‏، ئەمەش بەهەمانشێوە دڵسۆزیی و پەرۆشی خوێندکاران و کارگێڕی و مامۆستایان دەردەخات بۆ پاراستن و بەرەوپێشبردنی ژینگە و پاکوخاوێنی قوتابخانەکەمان.

 

لەگەڵ ڕێزدا…