ده‌نگ نێت

 

بریکاری وەزیری تەندروستی هەرێم لەبارەی دامەزراندنی کارمەندانی به‌شى نەخۆشخانەی قەڵای تایبەت بەتوشبوانی کۆرۆنا له‌كه‌لار دەڵێت: پڕۆژەمان پێشکەش کردوە ژماره‌یه‌كیان بەشێوەی گرێبەست دابمەزرێن.

 

له‌ سێ هه‌فته‌ى رابردودا دو جار کارمەندانی به‌شى نەخۆشخانەی قەڵای تایبه‌ت به‌ كۆرۆنا له‌ كه‌لار کە ژمارەیان زیاترە لە 100 كه‌س، گردبونه‌وه‌ و دوای دامەزراندنیان کرد.

 

لەبارەی به‌ده‌مه‌وه‌هاتنى داواكه‌یانه‌وه‌، بریکاری وەزیری تەندروستی هەرێم، د. رەهێڵ فەرەیدون، به‌ رادیۆی ده‌نگى وت: پڕۆژەیان پێشکەش کردوە و داوای دامەزراندنیان کردوە بۆ خۆبەخشەکان، بۆ ئه‌وه‌ى لەناوەندە تەندروستیەکان بەشێوەی گرێبەست دابمەزرێنەوە.

 

ئاماژه‌ى به‌وه‌شدا پرۆژه‌كه‌ نێردراوه‌ته‌ ئه‌نجومه‌نى وه‌زیرانى هه‌رێم و چاوەڕێی وەڵامی ئه‌وانن.

 

بریكارى وه‌زیری ته‌ندروستى هه‌رێم، له‌باره‌ى به‌ركه‌وته‌ى گه‌رمیان له‌ دامه‌زراندن دا رونیكرده‌وه‌: پرۆژه‌كه‌ به‌شێوه‌یه‌كه‌ ئەگەر 100 کەس لە سنوری پارێزگای سلێمانی دابمەزرێت، 13 کەسی بۆ ئیدارەی گەرمیان دەبێت.

 

به‌شى نه‌خۆشخانه‌ى قه‌ڵا پاش نه‌مانى نه‌خۆشی كۆرۆنا، بۆماوه‌یه‌ك داخرا و دواتر كرا به‌ به‌شى هه‌ناویی نه‌خۆشخانه‌ى گشتى كه‌لار، كه‌ ژماره‌یه‌ك له‌ كارمه‌ندانى خۆبه‌خش كارى تێدا ده‌كه‌ن.