دەنگ نێت

 

بەشداربوانی پرۆژەی نیشتەجێبونی قەڵای شێروانە لەکەلار دەڵێن: پارەی ٥ قیستمان لێوەرگیراوە لە ماوەی ٢ ساڵدا، هیچ خانویەکیشمان بۆدروست نەکراوە، بەرێوبەری وەبەر‌هێنانی گەرمیانیش ئەوە دەخاتەڕو کاتی تەواوکردنی یەکەکان دیاریی نەکراوە و بەرپرسیش نین لەو پارەیەی کۆمپانیا لە هاوڵاتی وەرگرتوە.

 

لە بڵاوکراوەیەکدا کە بەشداربوانی پڕۆژەی یەکەی نیشتەجێبونی قەڵای شێروانە لەکەلار وێنەیان بۆ رادیۆی دەنگ ناردوە، ئەوەیان خستۆتەڕو: پڕۆژەکە لەکاتێدا نزیکەی ٢ ساڵە دەستی پێکراوە،بەڵام تەنها رێژەی ١٠٪ـی تەواوکراوە و هیچ پڕۆژەیەکی خزمەتگوزاریشی تێدا نەکراوە.

 

کاروان کەریم، بەشداربویەکی پڕۆژەکەیە، بە رادیۆی دەنگی وت: ٢ رۆژ پێش ئێستا سەردانی پڕۆژەکەم کرد هیچ خانویەکم بۆ دروست نەکراوە و هیچ شتێکم نەبینی.

 

دەشڵێت: تاوەکو ئێستا ٥ قیستم داوە.

 

هاوکات بەڕێوبەری وەبەرهێنانی گەرمیان، هونەر مەحمود، بۆ رادیۆی دەنگ باسی لەوە کرد: پڕۆژەکە بەگشتی بە رێژەی ٪٢٩ تەواو بوە، یەکەکانیش بەڕێژەی ٪١٢.

 

دەڵێت: کاتی تەواوبونی پڕۆژەکە دیاریی نەکراوە، ئەوەی کە وتراوە ٤ ساڵ تەواو دەبێت، مەبەست لە ٤ ساڵ کارکردن بوە نەک کاتی تەواوکردنی پڕۆژەکە.

 

لە بارەی کێشەی کۆمپانیا و هاوڵاتیانەوە، دەڵێت: ئێمە بەهیچ شیوەیەک بەرپرس نین لەوەی هاوڵاتی پارەی بەکۆمپانیا داوە، نابێت پارە بەکۆمپانیا بدرێت، بەڵکو دەبێت بدرێتە بانکی جیهان و پاشانیش بۆ ئێمە.