ده‌نگ نێت

 

بەپێی ژماره‌یه‌ك پسوڵه‌ى گومركى مه‌رزی په‌روێزخان، پاره‌یه‌كى زۆر له‌ باره‌كانى مه‌رزه‌كه‌ وه‌رده‌گیرێت به‌ناوى "ئاوه‌دانكردنه‌وه‌"وه‌، به‌ڕێوبه‌رى مه‌رزه‌كه‌ش ئاماده‌ نیه‌ رونكردنه‌وه‌ى له‌باره‌وه‌ بدات و ده‌ڵێت: بڕیاری وه‌زاره‌ته‌.

 

به‌پێی ژماره‌یه‌ك پسوڵه‌ى "37 ئەلیف" كه‌ تایبەتە بە گومرک و له‌ مه‌رزی په‌روێزخانه‌وه‌ ده‌رچوه‌، شۆفێرێک لە به‌رامبه‌ر گواستنه‌وه‌ى بارێك پاشه‌ڕۆی نه‌وت دا، بڕی 880 هه‌زار دینار گومركی لێوه‌رگیراوه‌ له‌ژێر ناوی 7 جۆری جیاواز دا، یەکێک لەوانه‌ش "ئاودانکردنەوە"یە کە له‌ به‌رامبه‌ری دا به‌ بڕی 309 هەزار دینار پاره‌ى لێوه‌رگیراوه‌.

 

لە باره‌ى ئه‌وه‌ى مه‌به‌ست له‌م بڕگه‌ى ئاوه‌دانكردنه‌وه‌یه‌ چیه‌ و تایبه‌ته‌ به‌ چ بوارێك و پاره‌كه‌ش ده‌چێته‌ هیچ سندوقێكى تایبه‌تى ئاوه‌دانكردنه‌وه‌وه‌ یان نا، رادیۆی ده‌نگ په‌یوه‌ندی به‌ هێمن نوری، به‌ڕێوبه‌رى گومركی گه‌رمیانه‌وه‌ كرد، به‌ڵام ناوبراو رایگه‌یاند: ناتوانێت "هیچ لێدوانێک بدات"، ته‌نها ئه‌وه‌ى وت كه‌ گومرك و بڕه‌كه‌ى کاری وەزاره‌تە و لەسەرەوە بڕیاری لەسەر دراوە.

 

ئه‌مه‌ش له‌كاتێكدایه‌ خودی مه‌رزه‌كه‌ له‌ روى پێكهاته‌وه‌ كێشه‌ى زۆری هه‌یه‌ و هیچ سیمایه‌كى مه‌رزێكى نێوده‌وڵه‌تى نیه‌، ئه‌مه‌ جگه‌ له‌وه‌ى ئه‌و رێگاوبانانه‌شى كه‌ شاره‌كان ده‌گه‌یه‌نن به‌ مه‌رزه‌كه‌، زۆر خراپ و نه‌گونجاون.