ده‌نگ نێت

 

لە سەر روباری سیروان پڕۆژەیەکی  بازرگانی و گەشتیاری و نیشتەجێبون ئەنجام دەدرێت، وەبەرهێنانی گەرمیان دەڵێت: پڕۆژەکە رەزامەندی وەرگرتوە، بەوتەی سەرۆکی شارەوانی کەلاریش كه‌نارى روباری سیروان كراوه‌ته‌ پێنج به‌شه‌وه‌ و پڕۆژەی هاوشێوە بۆ به‌شه‌كانى تریش ئەنجام دەدرێت.

 

هونەر مه‌حمود، بەڕێوبەری وەبەرهێنانی گەرمیان، بە رادیۆی دەنگی وت: پڕۆژەکە  پێکهاتوە لە پڕۆژەیەکی تێکەڵ کە گەشتیاری و بازرگانی و نیشتەجێبون دەگرێتەخۆ.

 

وتیشی: ئەو پرۆژەیە دراوە بەکۆمپانیایەک "به‌بێ ئه‌وه‌ى ناوى كۆمپانیاكه‌ بهێنێت" و رەزامەندی سەرجەم لایەنە پەیوەندیدارەکانی وەرگرتوە و زەوی بۆ تەرخانکراوە، ئێستا له‌ راییکردنی مامەڵە ئیداریەکانی دایە، به‌وپێیه‌ى پرۆژه‌مه‌ ماوەی 4 ساڵی ده‌وێت بۆ ته‌واوكردنى.

 

له‌باره‌ى به‌شى یه‌كه‌كانى نیشته‌جێبون، ئاماژه‌ى به‌وه‌كرد: 800 خانو لە خۆدەگرێت لەگەڵ ژمارەیەک شوقە، وتیشی: پرۆژه‌كه‌ تایبەت نیە بە هیچ چین و توێژێکی دیاریکراو.

 

كه‌نارى روباری سیروان له‌ به‌رى كه‌لاره‌وه‌، کراوەتە پێنج بەشەوە، بۆ هەمو بەشه‌کانی دیکە پلان هەیە و داواکاری کراوە کە پڕۆژەی تیدا ئەنجامبدرێت، ئەمەش بەوتەی سەرۆکی شارەوانی کەلار.

 

ئەکرەم ساڵح  بە رادیۆی دەنگی راگەیاند: ئێستا تەنها یەک بەشی سەر روبارەکە  دەکرێتە پرۆژە، بەڵام بەشێکی زۆر پرۆژەمان پێشکەش کراوە بۆ بەشەکانی دیکە و پلانی ئەوەمان هەیە.

 

وتیشی: ئەو پڕۆژانەی ئێمە پەسەندی دەکەین دەبێت پڕۆژەی تێكه‌ڵاو "میکس" بن، به‌و مانایه‌ى پرۆژه‌ى گەشتیاری و بازرگانی و نیشتەجێبون بن.

 

لە بارەی ئەوەی کە کارگە و خانوەکانی كه‌نارى روبارەکە چۆن مامەڵەیان لەگەڵ دەکرێت؟ سه‌رۆكى شاره‌وانى كه‌لار ئەوەی خستەڕو "هیچیان لەسەر روبارەکە نامێننەوە، خانوەکان قەرەبو دەکرێنەوە و کارگەکانیش شوێنی تایبەتیان لە ناوچەی پیشەسازی بۆ دابین دەکرێت.