ده‌نگ نێت

 

چوار گه‌نجى دانیشتوى قه‌زاى كفری، پاش ئه‌وه‌ى وه‌ك ناڕه‌زایه‌تى ده‌ربڕین له‌ مانگرنى كۆمپانیای كۆكردنه‌وه‌ى خۆڵ و خاشاكى شاره‌كه‌ بڕێك خۆڵ و خاشاك ده‌به‌نه‌ به‌رده‌م بینای قایمقامیه‌ت، به‌ فه‌رمانى دادوه‌ر ده‌ستگیر ده‌كرێن و پاش شه‌وێك مانه‌وه‌ له‌ گرتوخانه‌، به‌ كه‌فاله‌ت ئازاد ده‌كرێن.

 

شه‌ماڵ ره‌ئوف، چالاكوانى مه‌ده‌نى له‌ قه‌زاى كفرى، بۆ رادیۆى ده‌نگ وتى: "وه‌ك ناڕه‌زایه‌تیه‌ك 4 گه‌نج به‌شێك له‌و خۆڵ و خاشاكه‌ى كه‌ كۆبوه‌ته‌وه‌ له‌ به‌رده‌م ماڵه‌كه‌یان به‌هۆی كۆنه‌كردنه‌وه‌ى به‌كارگه‌ریی مانگرتنى كارمه‌ندانى كۆمپانیای كۆكردنه‌وه‌ى خۆڵ و خاشاك، بردویانه‌ته‌ به‌رده‌م قایمقامیه‌تى قه‌زاكه‌ به‌و هۆیه‌شه‌وه‌ ده‌ستگیركراون.

 

وتیشى: به‌وهۆیه‌وه‌ له‌ دوێنێوه‌ ده‌ستگیر كراون و ئه‌مڕۆش به‌ كه‌فاله‌ت ئازاد كراون.

 

ئه‌مه‌ له‌ كاتێكدایه‌ بۆ ماوه‌ى چه‌ند رۆژێكه‌ كارمه‌ندانى كۆمپانیاى كۆكه‌ره‌وه‌ى خۆڵ و خاشاك ده‌ستیان داوه‌ته‌ مانگرتن له‌به‌رامبه‌ر پێنه‌دانى موچه‌كانیان و به‌وهۆیه‌وه‌ خۆڵ و خاشاك كۆبوه‌ته‌وه‌.

 

رادیۆى ده‌نگ بۆ وه‌رگرتنى زانیاری زیاتر له‌سه‌ر ئه‌م پرسه،‌ په‌یوه‌ندى به‌ قایمقامى قه‌زاى كفریه‌وه‌ كرد، به‌ڵام په‌یوه‌ندیه‌كه‌ى بێوه‌ڵام بو.