ده‌نگ نێت

 

دوای شکاندنی ترافیک لایتی نزیك یاریگاى كه‌لار، وتەبێژی پۆلیسی گەرمیان دەڵێت: تاوەکو ئێستا 10 کەس به‌تۆمه‌تى به‌شداربون له‌و كاره‌، دەستگیر کراون.

 

دوای یاری نێوان یانەی شێروانە  و یانەی سۆران له‌ رۆژى پێنجشه‌مه‌ى رابردو، چه‌ند كه‌سێك په‌لامارى ترافیك لایتی نزیك یاریگای كه‌لاریان دا و به‌ به‌رد و شه‌ق ترافیك لایته‌كان و كاميَراكانى چاودێری و گوڵۆپى روناكيةكانیان شكاند.

 

عەلی جه‌مال قەدوری، وتەبێژی پۆلیسی گەرمیان، بە رادیۆی دەنگی راگەیاند: لە ئێستا له‌سه‌ر ئه‌و روداوه‌، 10 كه‌س به‌ فه‌رمانى دادوه‌ر ده‌ستگیر كراون و لێكۆڵینه‌وه‌یان له‌گه‌ڵدا ده‌كرێت.

 

به‌پێی گرته‌ ڤیدیۆییه‌ك كه‌ بڵاوبوه‌ته‌وه‌، زۆرینه‌ى ئه‌وانه‌ى په‌لاماری ترافیك لایته‌كان ده‌ده‌ن و ده‌یشكێنن، مێردمناڵن.

 

وته‌بێژی پۆلیسی گه‌رمیان، جه‌ختى له‌وه‌كرده‌وه‌ كه‌ ده‌ستگیركراوه‌كان مناڵ و مێردمناڵن و ته‌مه‌نیان جیاوازه‌.

 

هه‌ر ئه‌مڕۆش هاتوچۆی گه‌رمیان له‌باره‌ى ئه‌و روداوه‌وه‌، راگه‌یه‌نراوێكى بڵاوكرده‌وه‌ و تیایدا ئاشكراى كرد: سكاڵاى له‌سه‌ر ئه‌و كه‌سانه‌ تۆمار كردوه‌ كه‌ ترافیك لایته‌كانیان شكاندون و دادوه‌ریش فه‌رمانى گرتنى بۆ چه‌ند كه‌سێك له‌وانه‌ ده‌ركردوه‌.

 

هێرشكردنه‌ سه‌ر ئه‌و ترافیك لایته‌، پاش ئه‌وه‌هات كه‌ دواى ته‌واوبونى یاری نێوان یانه‌كانى شێروانه‌ و سۆران كه‌ به‌ بردنه‌وه‌ى شێروانه‌ به‌ دو گۆڵی بێوه‌ڵام كۆتایی هات، هانده‌ران هێرشیان كرده‌ سه‌ر یاریزان و تیمی ئیداریی یانه‌ى سۆران و پاسى گواستنه‌وه‌ى یاریزانانیان، به‌وهۆیه‌وه‌ یاریزان و ده‌سته‌ى كارگێڕی یانه‌ میوانه‌كه‌ به‌ ئؤتؤمبيلي گواستنه‌وه‌ى ته‌رم هه‌تا ده‌روازه‌ى كه‌لار بران و له‌وێ سوارى پاسه‌كه‌یان كران.

هه‌روه‌ك دوای یارییه‌كه‌ش له‌ ده‌وروبه‌رى یاریگاكه‌ ئاڵۆزی دروست بو و هانده‌ران ده‌ستیان به‌ به‌رد وه‌شاندن كرد و دواتر هێزه‌ ئه‌منیه‌كان بڵاوه‌يان پێكردن.