رادیۆی دەنگ

 

زیاتر لە دو هەفتەیە كاركردن لە رێگای دەربەندیخان زەڕایەن وەستاوە، قایمقامی دەربەندیخانیش هۆکارەکەی دەگەڕێنێتەوە بۆ خەرجنەکردنی پارە بۆ كۆمپانیای جێبەجێكاری پرۆژەکە.

 

پرۆژەی بەدووسایدکردنی رێگای دەربەندیخان ـ زەڕایەن، لە مانگی چواری ساڵی رابردو کارەکانی دەستیپێکرد، بڕیار بو لە ماوەی ساڵێکدا کارەکانی تەواو بکرێت.

 

سلێمان محەمەد، قایمقامی قەزای دەربەندیخان بەرادیۆی دەنگی راگەیاند: بە هۆكاری خەرجنەكردنی پارە، کۆمپانیاکە زیاتر لە دو هەفتەیە بڕیاریانداوە كارەكانیان بوەستێنن تا وەرگرتنی پارە.

 

وتیشی: كاری بڕین و دانانی راگر و چەندین كاری تر لە رێگاكەدا كراوە و بەوشێوەیە جێهێڵدراوە كە رێگاكە خۆی دەبینێتەوە لە زیاتر لە ١٠ كیلۆمەتر.