رادیۆی دەنگ

 

له‌ ساڵى 2014ـەوه‌ به‌كاریگه‌ریی قه‌یرانى دارایی تاوه‌كو ئێستا، بیناى قوتابخانه‌ له‌ قه‌زاى رزگاریی دروست نه‌كراوه‌، چالاكوانێكیش ده‌ڵێت ژماره‌ى خوێندكار رۆژ دواى رۆژ زیاد ده‌كات و قوتابخانه‌كان به‌ره‌و سێ ده‌وامى ده‌ڕۆن.

 

سه‌ریاس ئیبراهیم، چالاكوان و مامۆستا له‌ قه‌زاى رزگاریی بۆ رادیۆى ده‌نگ وتى: 11 ساڵە هیچ بینایەکی قوتابخانه‌ لە قەزاکەماندا لەلایەن حکومەتەوە دروستنه‌كراوه‌.

 

وتیشى: له‌گه‌ڵ ئه‌وه‌دا کە بینا دروست ناكرێت، ژماره‌ى قوتابیش رۆژ دواى رۆژ زیاتر ده‌بێت، به‌شێكى قوتابی و خوێندکاری لادێكانیش دێنه‌ قه‌زاکەمان،‌ ئه‌مه‌ش وایكردوه‌ لۆدێكى زۆر دروست ببێت و ده‌وامى قوتابخانەکان به‌ره‌و سێ ده‌وامى هه‌نگاوبنێت.

 

هێماى بۆ ئه‌وه‌شكرد: سه‌ربارى ئه‌وه‌ش، به‌شێكى زۆرى بیناى ناوه‌نده‌كان كۆنن و شێوه‌یان له‌ زیندان ده‌چێت بۆ فێرخواز.

 

له‌باره‌ى ئه‌وه‌ى قه‌زاكه‌ پێویستى به‌ چه‌ند بینا ده‌بێت له‌ ئێستادا، سه‌ریاس ئیبراهیم، ده‌شڵێت: داتایه‌كى وا به‌رده‌ست نیه‌ بۆ ئه‌و مه‌به‌ستە،‌ پێویسته‌ هه‌ڵسه‌نگاندنى بۆ بكرێت، به‌ڵام به‌شێوه‌یه‌كى گشتى قه‌زاكه‌ پێویستى به‌ 10 بینا هه‌یه‌ به‌ 2 ده‌وامیشه‌وه‌.