رادیۆی دەنگ

 

له‌ سنورى په‌روه‌رده‌ى كه‌لار نزیكه‌ى 75 بینای قوتابخانه‌ پێویستیان به‌ نۆژه‌نكردنه‌وه‌ هه‌یه‌، به‌ڕێوبه‌رى به‌ڕێوبه‌رایه‌تیەکەش‌ ده‌ڵێت: نزیكه‌ى 15 بینایان دۆخیان خراپه‌ و مه‌ترسى روخانیان له‌سه‌ره‌.

 

عه‌داله‌ت له‌تیف، به‌ڕێوبه‌رى به‌ڕێوبه‌رایه‌تى په‌روه‌رده‌ى كه‌لار، بۆ رادیۆى ده‌نگ باسى له‌وه‌كرد: پێشتر ناوی 67 بینامان پێشكه‌شكردوه‌ به‌مه‌به‌ستى نۆژه‌نكردنه‌وه‌یان، له‌وانه‌یه‌ ئێستا رێژه‌كه‌ گه‌شتبێت به‌ 75 بیناش، له‌و ژماره‌ بینایه‌ش نزیكه‌ى 15ـیان دۆخیان خراپه‌ و مه‌ترسى روخانیان له‌سه‌ره‌ كه‌ زۆرینه‌یان ده‌كه‌ونە‌ لادێكانه‌وه‌.

 

وتیشى: به‌ نوسراو داوامان له‌ ئیداره‌ى ئه‌و قوتابخانانه‌ كردوه‌ کە له‌ كاتى بونى بارانى زۆردا، ده‌وامى تێدا نه‌كه‌ن.

 

ده‌شڵێت: داوامان بەرزكردوه‌تەوە بۆ نۆژه‌نكردنه‌وه‌یان، بودجه‌ی پێویست بەو کارەش ته‌رخان كراوه‌ كه‌ نزیكه‌ى 1 ملیار دینار ده‌بێت، به‌ڵام تائێستا جێبەجێ نەکراون.

 

باسی لەوەشکرد نزیكه‌ى 3 ساڵه‌ تاوه‌كو ئێستا هیچ کارێک لەو پرۆژانەدا نه‌كراوه‌، له‌ كاتێكدا چه‌ند جارێكیش دراونه‌ته‌ ته‌نده‌رین، به‌ڵام هیچ کۆمپانیا و بەڵێندەرێک پرۆژەکانی وه‌رنه‌گرتوه‌ به‌هۆى کێشەی خەرجکردنی پارەوە.