رادیۆی دەنگ

 

دواى ئه‌وه‌ى واباسكرا لیستێكى تایبه‌تى پێشمه‌رگه‌ى دێرین گه‌ڕاوه‌ته‌وه‌ بۆ وه‌رگرتنى زه‌وى له‌ قه‌زاى كفرى و رزگاریی، به‌ڕێوبه‌رى گشتى شاره‌وانیه‌كانى گه‌رمیان ئه‌وه‌ ره‌تده‌كاته‌وه‌ ده‌ڵێت: شتى له‌وشێوه‌یه‌ نیه‌.

 

به‌رزان كه‌ریم، به‌ڕێوبه‌رى گشتى شاره‌وانیه‌كانى گه‌رمیان بۆ رادیۆى ده‌نگ وتى: دواى ئه‌وه‌ى ساڵى 2024 ئه‌نجومه‌نى وه‌زیران بڕیاریدا به‌ دابه‌شكردنى زه‌وى به‌سه‌ر فه‌رمانبه‌راندا، لیستی ناوی هیچ چین و توێژێکی جیاوازمان بۆ نه‌هاتوه‌ بۆ ئه‌وه‌ى زەویان پێبدرێت.

 

ده‌شڵێت: ئەوەی هەیە ئەوە‌یه‌ دواى وردبینیكردن هه‌ر جاره‌و وه‌جبەیەک ناومان بۆ ده‌گه‌ڕێته‌وه‌ كه‌ 500 بۆ 1000 ناو ده‌بێت.

 

هێماى بۆ ئه‌وه‌شكرد: هیچ لیستێكمان بۆ نه‌هاتوه‌ تایبه‌ت كه‌ حزب و لایه‌نێك ناردبێتى، چونكه‌ ئێمه‌ كار له‌سه‌ر نوسراوى فه‌رمى ده‌كه‌ین كه‌ بڕیارى ئه‌نجومه‌نى وه‌زیرانه‌ و ئه‌وه‌ى میلاكى حكومه‌ت بێت زه‌وى پێده‌درێت.

 

جه‌ختى له‌وه‌شكرده‌وه‌: هاوشێوه‌ى سه‌ندیكا و توێژە‌كانى دیكه‌، ساڵانى رابردو لیستێك ناومان بۆ هات له‌لایه‌ن حزبێكى سیاسیه‌وه‌ كارمان له‌سه‌ر نه‌كردوه‌ و زه‌وی به‌رده‌ست نه‌بوه‌ پێیان بدرێت.