د. ملکۆ ئەحمەد

 

هەبو  نەبو کچێکی کەرکوکی هەبو، حەزی لە لاساییکردنەوە و نواندن بو، ویستی بە لاساییکردنەوەی مامۆستاکەی دەستپێبکات، بەڵام کوڕگەل و کچگەل و کورە میدیاگەل گەلەکۆمەیەکیان کردەسەری کە بۆ هیچ پرسێکی نەتەوایەتیی نەکراوە!

 

نازانم ئەزانن مامۆستای کورد نزیکەی ١٣ ساڵە لەڕوی دارایی و دەرونیی و کەسایەتییەوە ئەشکێنرێتەوە؟ ئەزانن مامۆستا شەقی تێهەڵدرا، کورە تیرۆر کرا؟

 

با هەمومان باش دەزانین! بەڵام ئەمڕۆ بازاڕی تەشهیر گەرمە، ئەو گوڵە تازە پشکوتە ئیدی تا مردن نابوت کرا، ناشیرین کرا، بۆ؟ چونکە میدیای کوردی بێئیشە و دەیەوێ فەوکەس لەسەر پرسێکی دیاریکراو لاببات.

 

ئێوە دەزانن ئەو کچە بچوکە بۆ لەمەودا مامۆستاکان، دایبابی، دراوسێکانی، کورە کۆمەڵگا بەگشتیی چۆن لێی ئەڕوانن؟ ئایا دەزانن ئەم مناڵە بێئەزمونە بۆ هەتاهەتا دەشکێتەوە؟

 

وەڵڵا ئەم کچە ئەگەر ئەوروپایی ببوایە مامۆستاکانی و میدیای ئەوروپاش دەیانگوت ئەم کچە جوانە بەهرەی نواندن و لاساییکردنەوەی تێدایە، با برەو بەو بەهرەیە بدەین، ئەنجا بە ملیۆنێ قورئان من ئەو مامۆستایە ناناسم، بەڵام مناڵ زۆر هەستیارە لە دیارییکردنی کەسایەتیی مرۆڤەکان، پێدەچێ هەستی بەو لووتبەرزییە کردبێ و وتنی ڕاستیی هیچ کات نەبوەتە تاوان.

 

جا هەر بۆ زانیاریی جەنابتان هەمو مامۆستایەک هەڵگری ڕۆح و پەیامی مامۆستایەتیی نییە، مەبەستم مامۆستایانی زانکۆشە. لە وتاری دیکەمدا ئاماژەم بەوە کردوە کە مامۆستا و مۆستای زانکۆ هەیە هەقە پەیکەری بۆ دروست بکرێت، هەشە (….)! واتە بڕوانامە ئێمە ناکاتە زانا، بەڵکو قاڵبون و وردبونەوە و خۆشویستنی پیشەکە دەتکا بەو کەسەی خۆت دەتەوێ.

 

کاکە، دادە، توخوا خۆتان بخەنە جێی ئەو گوڵە، ئێستا باری دەرونیی چۆن بێ؟ ئێستا هاوپۆل و مامۆستاکانی لەمڕۆ بەدواوە چۆن لێی دەڕوانن کە میدیای کوردیی ئێژی باسی کەرکوک و ناوچە دابڕێنراوەکان دەکات؟

 

داوەشین بۆ ئەو کەناڵ وشوێن و لایەنەی لەسەر حیسابی پەپولە، زوڕنا بۆ زەردەواڵە لێدەدات!