رادیۆی ده‌نگ

 

نەخۆشخانەی مناڵان و مناڵبونی قەزای كفری كه‌ له‌لایه‌ن خێرخوازێكه‌وه‌ دروستكراوه‌، دوای ساڵێك لە تەواوبونی كاره‌كانى، ئه‌مڕۆ كرایەوە، تەندروستی گەرمیانیش دەڵێت: جارێ ته‌نها بەشی بەیانیان دەكەینەوە.

 

‎نەخۆشخانەی مناڵان و مناڵبونی قەزای كفری، له‌سه‌ر ئه‌ركی خێرخواز (عه‌باس حاجی فارس داردرێژ) دروستكراوه‌ و ماوەی ساڵێكە بیناكه‌ى ته‌واو بوه‌، ئه‌مڕۆ به‌ فه‌رمی له‌لایه‌ن به‌ڕێوبه‌رایه‌تى گشتى ته‌ندروستى گه‌رمیانه‌وه‌ كرایه‌وه‌.

 

‎لەمبارەیەوه‌، ئازاد حەمە فەرەج، وتەبێژی بەڕێوبەرایەتی گشتی تەندروستی گەرمیان، بە رادیۆی دەنگی وت: بە هۆی نەبونی كارمەندی تەندروستییەوە نەخۆشخانەكە ماوەی ساڵێكە تەواوبوە و نەمانتوانیوە بیكەینەوە، خۆشبه‌ختانه‌ ئه‌مڕۆ به‌ فه‌رمی كرایه‌وه‌.

 

‎وتیشی: لەو 168 فه‌رمانبه‌ره‌ى كە بە گرێبەست بۆ قه‌زاى كفری دامەزران، نزیكەی 20 فه‌رمانبه‌ریان بۆ نەخۆشخانە ته‌رخانكراون، به‌ڵام ئه‌م ژماره‌یه‌ هێشتا بەس نیە بۆ نەخۆشخانەكە و پێویستمان بە كارمەندی زیاترە.

 

‎باسی لەوەشكرد: سه‌رباری كه‌موكورتییه‌كان، ئەمڕۆ نەخۆشخانەكە خرایه‌ خزمەتی هاوڵاتییانەوە و له‌سه‌ره‌تاشدا تەنها بەشی بەیانیانی دەكەینەوە و هێشتا هیچ نەشتەرگەرییەكی تێدا ئەنجام نادرێت، بەڵام لە ئایندەیەكی نزیكدابە تەواوی هەمو به‌شه‌كانی دەكەینەوە.