رادیۆی دەنگ

 

ئەو کەسانەی لە نەخۆشخانە حکومییەکانی گەرمیان نەشتەرگەریی دەکەن یان لە سەنتەری تیشک لە کەلار سیتی سکان ئەنجام دەدەن، لەلایەن کۆمپانیایەکەوە پارەیان لێوەردەگیرێت لەبەرامبەر پێدانی جلی تایبەت پێیان.

 

بەپێی زانیارییەکانی رادیۆی دەنگ، لە نەخۆشخانە حکومییەکان و سەنتەری تیشک لە کەلار کە سەنتەرێکی حکومییە، پێشتر هاوڵاتی لەکاتی ئەنجامدانی نەشتەرگەریی یان پشکنینی سیتی سکان و لەرەی موگناتیسی MRI و هاوشێوەکانیان، پارەی تایبەتی بۆ جلوبەرگی نەشتەرگەریی و پشکنین لێوەرنەدەگیرا، بەڵام ئێستا 2 هەزار و 500 دیناریان لەلایەن کۆمپانیایەکەوە لێ وەردەگیرێت.

 

لەوبارەوە، ئازاد حەمەفەرەج، وتەبێژی بەڕێوبەرایەتی گشتی تەندروستی گەرمیان، بە رادیۆی دەنگی وت: ئەو پارەیە بەپێی بڕیاری وەزارەت وەردەگیرێت.

 

جەختی لەوەشکردەوە: بڕیارەکە تایبەت نییە بۆ گەرمیان، بەڵکو لە هەمو هەرێمی کوردستاندا هەروایە.