رادیۆی دەنگ

 

فەوتان و نەهاتنی هەندێک لە بەشەکانی خۆراک له‌ گه‌رمیان، یەکێکه‌ لەو گرفتانەی هاوڵاتیان و بریکارەکانی خۆراک باسی لێوەدەکەن، به‌شێوه‌یه‌ك مانگانە هەمو بەشەکانی خۆراک نایەت، بەڕێوبەرایەتی خۆراکی سنوره‌كه‌ش ده‌ڵێت: په‌یوه‌ندى به‌ به‌غداده‌وه‌ هه‌یه‌.

 

مه‌حمود حسێن، بریکاری خۆراک لە کەلار، له‌ لێدوانێكیدا بۆ یه‌كه‌ى چاودێریی حكومه‌تى خۆجێى گه‌رمیانى سه‌ر به‌ رادیۆى ده‌نگ، دەڵێت: هەمو کەرەستەکانی خۆراک بەبەردەوامی هەمو مانگێک نایەت، هەندێک لەو کەرەستانەی کە نایەت قەرەبو ناکرێتەوە، هاوڵاتی سەردانمان دەکات پرسیاری ئەو بەشەخۆراکانە دەکات کە پێویستی پێیەتی دەڵێن بۆ نەهاتوە.

 

دەشڵێت: لەمساڵدا بەشێکی زۆری زەیت فەوتاوە و نەهاتوە، ئەمە سەرەڕای ئەوەی جیاوازییەکی زۆر دەبینین دەکرێت لە نێوان ئەو بەشە خۆراکەی بۆ کوردستان دەنێردرێت بە بەراورد بەو خۆراکەی بەعێراق دەدرێت، ئه‌وان هەندێک کەرەستەی خۆراک وەردەگرن لە کوردستان نادرێت و نییە.

 

لە بەرامبەریشدا نوریە عه‌بدولحه‌مید، بەرێوبەری بەڕێوبەرایەتی بازرگانی و کەلوپەلی خۆراکی گەرمیان، دەڵێت: کێشەی نەهاتن و فەوتانی هەندێک لە بەشەکانی خۆراک، پەیوەندی بە بەغدادەوە هەیە، ئێمە هۆکارەکەی نازانین.