رادیۆی دەنگ

 

دوای ئەوەی پێش 2 مانگ لە گەرمیان دەستکرا بە وەرگرتنی سکاڵای کەسوکاری شەهیدان و ئەنفالکراوان دژ بە عەجاج تکریتی- لێپرسراوی بەندینخانەی نوگرە سەلمان، بەڕێوبەری گشتی شەهیدان و ئەنفالکراوانی گەرمیان دەڵێت: تا ئێستا 183 سکاڵا تۆمارکراوە.

 

عەجاج ئەحمەد، ناسراو بە عەجاج تکریتی، لێپرسراوی بەندینخانەی نوگرە سەلمان بو لە سەروبەندی تاوانی ئەنفال و دەستی زۆری هەبوە لە کوشتن و ئەشکەنجەدانی راگیراوانی پرۆسەکەدا.

 

ئەو سەرەتای مانگی ئابی ئەمساڵ، لەلایەن دەزگای ئاسایشی نیشتمانی عێراق دەستگیرکرا و دواتر دەستکرا بە وەرگرتنی سکاڵای کەسوکاری ئەنفال لە دژی.

 

جەبار عومەر، بەڕێوبەری گشتی شەهیدان و ئەنفالکراوانی گەرمیان، بە رادیۆی دەنگی وت: دوای ئەوەی پرۆسەیەک لە ماوەی 10 رۆژدا بۆ تۆمارکردنی سکاڵا لەسەر عەجاج دەستپێکرا، تائێستا 183 سکاڵا تۆمارکراوە.

 

دەشڵێت: لە ئێستادا لە دادگای بەرایی کەلار وتە لە سکاڵاکاران وەردەگیرێت و دوا بە دوای ئەمە دۆسییەکە ئاڕاستەی دادگای تایبەتمەند دەکرێت.