لە دڵی گەرمیانەوە، ناوی "عادل عەلی" وەک ئەستێرەیەکی درەوشاوە لە ئاسمانی وەرزشی ناوچەکە و کوردستان دەگەشێتەوە. گەنجێک کە ژیانی خۆی بۆ خزمەتکردنی تۆپی پێ تەرخانکردوە و دواجار گەیشتە لوتکەی دەستکەوت و نازناو.

 

 

سەرەتایەکی پڕ لە ئومێد

 

ساڵی 2004، عادل وەک یاریزانێکی گەنج و بەتوانا، دەرگای یانەی شێروانەی لێکرایەوە. چوار ساڵ لەو یانەیەدا درەوشایەوە و بنەمایەکی پتەوی بۆ داهاتویەکی گەش دروستکرد.

 

دواتر ئاراستەی گۆڕی بەرەو یانەی سیروانی نوێ، یانەیەک کە لە خولی نایابی کوردستاندا کێبڕکێی دەکرد. لەوێ شانازی بەدەستهێنانی پلەی دوەمی خولەکەی بەدەستهێنا. لەگەڵ ئەم دەستکەوتەدا، بەڵام دڵی هەر بۆ شێروانە لێیدەدا.

 

دوای دو ساڵ، گەڕایەوە ماڵی خۆی "یانەی شێروانە"، لەگەڵیاندا هەنگاوی گەورەی نا بۆ سەرخستنەوەی یانەکە بۆ خولی نایاب، ئەو خولەی کە شایستەیەتی.

 

 

کۆتاییەکی ناخۆش و دەستپێکی گەشانەوە

 

ساڵی 2017، بە ناچاریی ماڵئاوایی لە گۆڕەپانی یاریی کرد، پێکانێکی قورس لە ئەژنۆیدا بود هۆی ئەوەی عادل جلوبەرگی یاریزانی دابنێت.

 

خەونێک کۆتایی هات، بەڵام خەونێکی گەورەتر لەدایکبو. هەر لە کۆتایی 2017 و سەرەتای 2018، بڕوانامەی راهێنەرایەتی بەدەستهێنا و دەستی بەکاری راهێنەریی کرد.

 

لە یەکەم هەنگاوییدا بو بە راهێنەری تازەپێگەیشتوانی یانەی شێروانە. لێرەش تواناکانی سەلماند و پلەی دوەمی سەرپارێزگای سلێمانی بەدەستهێنا.

 

دواتر سەرپەرشتی لاوانی شێروانەی گەرمیان و هەروەها یاریدەدەری راهێنەری تازەپێگەیشتوان بو.

 

دوای ماوەیەک، رویکردە هەڵەبجە و بو بە راهێنەری یانەی پەیام، پاشان یانەی کفری لە خولی پلە دوەکاندا، بەردەوام لە گەڕان بەدوای ئەزمونی نوێدا.

 

 

گەڕانەوە بۆ شێروانە و خەونی پاڵەوانێتی

 

نیوەی وەرزی 2021، بانگەوازێکی تایبەت گەیشتە عادل. شێروانە لە کاتێکی سەختدا بو، نزیک بو لە دابەزین بۆ خولەکانی خوارەوە، یانەکە پێویستی بە عادل عەلی هەبو.

 

وەک راهێنەری پێشکەوتوان گەڕایەوە و تواناکانی خۆی خستەگەڕ بۆ رزگارکردنی یانەکە. ئەو کاتە بە شانازییەوە یانەکەی لە دابەزین رزگار کرد.

 

 

لوتکەی مێژو: پاڵەوانیەتی خولی نایاب!

 

وەرزی 2023-2025 بوە وەرچەرخانێکی مێژویی لە ژیانی عادل و یانەی شێروانەدا. بە سەرکردایەتی عادل، شێروانە بو بە یانەیەکی بەهێز و کێبڕکێکار لە خولی نایابدا.

 

لە وەرزی 2023-2024، پلەی سێیەمی خولی نایابیان بەدەستهێنا، نیشانەیەک لەوەی کە خەونێکی گەورەتر لەسەر رێگایە.

 

وەرزی دواتر، وەرزی هەرە نایابی یانەکەی گەرمیان بو. سەرەڕای ئاستەنگ و پێکانەکان، عادل عەلی بە لێهاتویی و خۆڕاگرییەوە یانەکەی بەرەو لوتکە برد و یانەکە لە سەروی ریزبەندییەوە مایەوە.

 

لە کۆتاییدا خەونەکە بو بە راستی! یانەی شێروانەی گەرمیان، دوای 33 ساڵ لە دامەزراندنی، بۆ یەکەمجار لە مێژوی خۆیدا بو بە پاڵەوانی خولی نایابی کوردستان بۆ تۆپی پێ.

 

ئەم دەستکەوتە مێژوییە، تەنها بۆ یانەی شێروانە نەبو، بەڵکو بۆ تەواوی گەرمیان، وایکرد خەونی دانیشتوانی شارەکە ببێتە واقیع.

 

عادل عەلی، کە خۆی خەڵکی شارەکە بو، هەستی خۆشحاڵی و شانازییەکی بێ ئەندازەی هەبو بەوەی یەکەمین راهێنەرە کە ئەم نازناوە گەورەیە بۆ شێروانە بەدەستدەهێنێت.

 

لە کۆتایی وەرزدا، عادل عەلی وەک باشترین راهێنەری خولەکە هەڵبژێردرا، خەڵاتێک کە شایستەی تێکۆشان و لێهاتویی و کۆڵنەدانی ئەو گەنجە بو.

 

ناوی عادل عەلی وەک ئەستێرەیەکی هەمیشە داگیرساو لە گەرمیاندا دەمێنێتەوە، چونکە ئەو تەنها جامێکی بۆ یانەکەی بەدەستنەهێنا، بەڵکو گیانێکی نوێی بەخشییە شارێک، ئومێدێکی گەورەی بۆ نەوەکانی داهاتو چاند و سەلماندی کە بە ئیرادە و خۆبەختکردن، هیچ خەونێک دور نییە.