رادیۆی دەنگ

 

بەپێی ئامارێكی پۆلیسی گەرمیان، تەنها ئەمساڵ 165 حاڵەتی خراپ بەكارهێنانی ئامێرەكانی پەیوەندیی تۆماركراون، وتەبێژی پۆلیسی گەرمیانیش دەڵێت: یەکێکە لە تاوانە بەربڵاوەکان.

 

عەلی جەمال قەدوری، وتەبێژی بەڕێوبەرایەتی پۆلیسی گەرمیان، بە رادیۆی دەنگی وت: لە ماوەی 8 مانگی ئەمساڵدا، 165 حاڵەتی خراپ بەكارهێنانی ئامێرەكانی پەیوەندی تۆماركراون.

 

وتیشی: لە نێو ئەو حاڵەتانەشدا حاڵەتەکانی هەڕەشەکردن و توندوتیژیی بەرامبەر بە ژنانیش هەن.

 

باسی لەوەشکرد، تاوانەکانی پەیوەست بە ئامێرەکانی پەیوەندییکردن، لە تاوانە بەربڵاوەکانن.

 

دەشڵێت: پێشوتر زەحمەت بو ئەو کەسانە بدۆزرێتەوە کە توندوتیژیی بەرامبەر بە ژنان ئەنجامدەدەن لە رێگەی ئامێرەکانی پەیوەندییکردنەوە، بەڵام ئێستا ستافێکی بەهێز و شارەزامان هەیە و لەژێر رۆشنایی و بڕیاری دادوەری لێکۆڵینەوە، لێکۆڵینەوە لەو تاوانانە دەکەن و بکەرانی ئاشکرا دەکەن.

 

باسی لەوەشكرد: زۆر تاوانی ئامێرەکانی پەیوەندیی هەبون کە توانیومانە تاوانبارانی ئاشکرا بکەین و دەستگیریان بکەین و روبەڕوی یاسایان بکەینەوە.