رادیۆی ده‌نگ

 

سەرۆكی لقی گەرمیانی كۆمەڵەی داكۆكی لە مافی كرێنشینان باس له‌وه‌ده‌كات به‌وهۆیه‌ى چاودێریی نییه‌ و ژماره‌یه‌كى زۆر هاولاتى عه‌ره‌ب رویان له‌ناوچه‌كه‌ كردوه‌، هه‌ربۆیه‌ نرخی كرێ خانو به‌رده‌وامه‌ له‌ به‌رزبونه‌وه‌.

 

سەیوان كەریم، سەرۆكی لقی گەرمیانی كۆمەڵەی داكۆكی لە مافی كرێنشینانی كوردستان، بە رادیۆی دەنگی وت: نرخی كرێی خانو زۆر بەرزبوەتەوە بە جۆرێك بەرزترین نرخی گەشتوەتە سه‌روى 400 هەزار دینار.

 

له‌باره‌ى هۆكاره‌كانیشه‌وه‌، وتى: هاوڵاتیەكی زۆری عەرەب دێنە سنورەكە و خانوی به‌ كرێ دەگرن، ئەمەش وایكردوە ژماره‌ى خانوی كرێ كەمبێتەوە و خاوەنی خانوەكانیش نرخەكان بە دڵی خۆیان دیاریدەكەن.

 

له‌باره‌ى بونى چاودێریی له‌سه‌ر نرخه‌كان و دیارییكردنیان به‌پێی پێوه‌رێك، سه‌یوان كه‌ریم باسی لەوەشكرد: نه‌ چاودێریی هه‌یه‌ لەسەر هاتنی هاوڵاتى شوێنه‌كانى دیكه‌ بۆ سنوره‌كه‌ و نه‌ چاودێرییش هه‌یه‌ له‌سه‌ر دیارییكردنی نرخی كرێی خانو.