رادیۆی ده‌نگ

 

كڕینی ئۆتۆمبیله‌ چینییەکان بونەتە یەکێک لە بژاردە سەرەکییەکانی کڕیاران لە گەرمیان، خاوەنی پێشانگایەکی ئۆتۆمبیلیش ئاشکرای دەکات هۆکاری سەرەکیی ئەم خواستە زۆرە بۆ نرخی هەرزان و گونجاویی ده‌گه‌ڕێته‌وه‌.

 

ئومێد سەباح، خاوەنی یەکێک لە پێشانگاکانی فرۆشتنی ئۆتۆمبێل لە قەزای کەلار، لە لێدوانێکدا بۆ رادیۆی دەنگ وتى: خواستێکی زۆر باش لەسەر ئۆتۆمبێلە چینییەکان هەیە و هۆکارەکەشی رونە؛ نرخەکەی لەبارە بۆ ئەو کەسانەی توانای کڕینی ئۆتۆمبێلی گرانبەهایان نییە.

 

وتیشی: "دەتوانین بڵێین بوەتە ئۆتۆمبێلی فەقیر و هەژاران".

 

بە وتەی ئومێد سەباح، ئەو کڕیارانەی تائێستا ئۆتۆمبێلی چینییان بەکارهێناوە، گلەییەکی ئەوتۆیان نەبوە، بەڵام جەخت لەسەر یەک خاڵی گرنگ دەکاتەوە: "ئەم ئۆتۆمبێلانە بزوێنەری هەستیاریان هەیە و پێویستیان بە بەنزینی باش و کوالیتی بەرز هەیە بۆ ئەوەی بەبێ کێشە کار بکەن و تەمەنیان درێژ بێت".

 

پێشتر بازاڕی ئۆتۆمبێل لە هەرێمی کوردستان بەدەست براندە ناسراوەکانی وەک تۆیۆتا، کیا، هیۆندای و ئۆتۆمبێلە ئەمریکییەکانەوە بو، له‌گه‌ڵ هه‌ندێك مۆدێلی تری ئه‌وروپی، بەڵام بەهۆی ناجێگیریی دۆخی ئابوری و دواکەوتنی موچە، توانای کڕینی هاوڵاتییان دابەزیوە، لەم بۆشاییەشدا کۆمپانیا چینییەکان توانیویانە بەرهەمەکانیان بە نرخی کێبڕکێکار و بە شێوەی "سفر کیلۆمەتر" بخەنە بازاڕەوە.

 

براندەکانی وەک هاڤاڵ (Haval)، چانگان (Changan)، جیتۆر (Jetour) و ئێم جی (MG)، ئێستا بونەتە ناوێکی ئاشنا لەسەر شەقامەکانی کوردستان و به‌تایبه‌تى گه‌رمیان، چونكه‌ ئەم کۆمپانیایانە نەک تەنها نرخی گونجاو پێشکەش دەکەن، بەڵکو بۆ چه‌ند ساڵێكیش گره‌نتى ده‌كه‌ن.

 

پێشتر یەکێک لە نیگەرانییە سەرەکییەکانی کڕیاران بۆ ئه‌و ئۆتۆمبیلانه‌ى كه‌ كۆریی و یابانیی نین، نەبونی پارچەی یەدەگ بو، بەڵام وەک ئومێد سەباح ئاماژەی پێدا، ئێستا بارودۆخەکە گۆڕاوە و کۆمپانیا بریکارەکان (وەکیلەکان) خۆیان پارچەی یەدەگی پێویست دابین دەکەن و لە بازاڕیشدا بەردەست دەبن.