رادیۆی ده‌نگ

 

له‌میانه‌ى گفتوگۆیه‌كدا، ژماره‌یه‌ك رۆژنامه‌نوس له‌گه‌ڵ قایمقامی قه‌زاى كه‌لاردا، تاوتوێی دۆخی خزمه‌تگوزارییه‌كانى قه‌زاكه‌ و چۆنیه‌تى به‌ره‌وپێشبردنیان كرد.

 

گفتوگۆكه‌ یه‌كه‌ى چاودێریی حكومه‌تى خۆجێی گه‌رمیانى سه‌ر به‌ رادیۆی ده‌نگ، له‌ چوارچێوه‌ى پرۆژه‌یه‌كى رادیۆكه‌ به‌ پاڵپشتى سندوقی نیشتمانى بۆ دیموكراسی NED، ئه‌مڕۆ (چوارشه‌مه‌ 13/8/2025) له‌ هۆڵی سه‌نته‌رى گه‌نجانى كه‌لار به‌ڕێوه‌ی برد.

 

له‌ گفتوگۆكه‌دا كه‌ 12 رۆژنامه‌نوس له‌ كه‌ناڵ و ده‌زگا میدیاییه‌ جیاوازه‌كان به‌شدارییان كرد، روبه‌ڕو له‌گه‌ڵ عارف عادل، قایمقامی قه‌زاى كه‌لار گفتوگۆیان كرد.

 

له‌گفتوگۆكه‌دا سه‌ره‌تا قایمقامی قه‌زاى كه‌لار، تیشكیخسته‌ سه‌ر كار و چالاكییه‌كانیان له‌ماوه‌ى شه‌ش مانگى ده‌ستبه‌كاربونى دا، هه‌روه‌ك ئاماژه‌ى به‌ ئاله‌نگاری و ئاسته‌نگییه‌كانى به‌رده‌میشیان كرد.

 

دواتر رۆژنامه‌نوسان هه‌ریه‌كه‌یان له‌لای خۆیه‌وه‌ تێبینی و سه‌رنج و پرسیاری خۆیان له‌باره‌ى دۆخی خزمه‌تگوزارییه‌كان خسته‌ڕو و به‌وردیی ئاماژه‌یان به‌و كه‌موكورتیی و كێشانه‌دا كه‌ له‌ قه‌زاكه‌دا بونى هه‌یه‌.

 

پاشان قایمقامی كه‌لار وه‌ڵامى پێویستی ئه‌و تێبینی و پرسیارانه‌ى دایه‌وه‌ و گفتوگۆیه‌كى به‌رهه‌مدار له‌نێوان هه‌ردولادا به‌ڕێوه‌چو.

 

ئه‌م چالاكییه‌، یه‌كێكه‌ له‌و چالاكییانه‌ى كه‌ یه‌كه‌كه‌ له‌پێناو بره‌ودان به‌ پرۆسه‌ى چاودێریی حكومه‌ت و دروستكردنى په‌یوه‌ندیی ته‌ندروست له‌نێوان حكومه‌ت و كۆمه‌ڵی مه‌ده‌نی و هاوڵاتیاندا، ئه‌نجامی ده‌دات.

 

* ده‌رباره‌ى یه‌كه‌ى چاودێریی حكومه‌تى خۆجێی گه‌رمیان

 

یه‌كه‌یه‌كى رۆژنامه‌وانى و به‌دواداچونى تایبه‌تى رادیۆی ده‌نگه‌، به‌ پاڵپشتی سندوقی نیشتمانى بۆ دیموكراسی ئه‌مریكی (NED) ساڵی 2017 دامه‌زراوه‌. كارى چاودێرییكردنى حكومه‌تى خۆجێیی گه‌رمیان ئه‌نجام ده‌دات به‌مه‌به‌ستى په‌ره‌دان به‌كاره‌كانیان و هه‌روه‌ها بره‌ودان به‌ پرۆسه‌ى چاودێرییكردن و شه‌فافیه‌ت و پته‌وكردنى په‌یوه‌ندیی نێوان هاوڵاتى و ده‌سه‌ڵات و دروستكردنى لێكتێگه‌یشتنێكى باشتر بۆ په‌ره‌دانى زیاتر به‌ خزمه‌تگوزاریه‌كان، ئه‌میش له‌ڕێگه‌ى ئاماده‌كردنى راپۆرتى مانگانه‌ و ئه‌نجامدانى گفتوگۆی كراوه‌ و كۆبونه‌وه‌ و سیمینار و كۆنفرانس و خولی جیاوازه‌وه‌.