رادیۆی دەنگ

 

ئەمڕۆ لەسەر سکاڵای پەیمانگای هونەرەجوانەکانی کفری، هونەرمەندی شانۆکار. محەمەد هیجران، بەبڕیاری دادگای کفری بۆ ماوەی 25 رۆژ راگیراوە.

 

هەورامان جەلال، چالاکوان و هاوڕێی هونەرمەند شانۆکارمان محەمەد هیجران، هەواڵەکەی بۆ رادیۆی دەنگ پشتڕاستکردەوە و وتی: پێشتر محەمەد پۆستێکی رەخنە ئامێزی لەسەر پەیمانگاکە لە هەژماری خۆی لە فەیسبوک کردبو، ئیدارەی پەیمانگاکەش سکاڵای لەدژ تۆمارکرد و لەسەر ئەو سکاڵایە ئەمڕۆ لەلایەن دادوەرەوە راگیراوە تا 5ـی ئەیلول.

 

پۆستەکەی ئەو شانۆکارە بۆ سەرەتای مانگی ئایاری ئەمساڵ دەگەڕێتەوە و لە لێدوانێکدا ئەوکات بە رادیۆی دەنگی وتوە: "پۆستەکەم لەسەر ئەوە بوە کە ساڵانی رابردو پەیمانگاکە مامۆستای بە ئەزمونی تێدابو و نزیکەی 200 خوێندکار داوای پێشکەشکردبو بۆ خوێندن تیایدا، بەڵام ئێستا لەکۆی پێنج بەش تەنها 10 خوێندکاری تێدایە و تا دێت بەرەو دواوە دەچێت، هیچ چالاکیەکی تێدا ناکرێت و بەشی شانۆ خەریکە دادەخرێت. "

 

هەر ئەوکاتیش، داود محەمەد، بەڕێوبەری پەیمانگای هونەرە جوانەکانی کفری، بە رادیۆی دەنگی وتبو: "ئەو شانۆکارە چەند هەڵەیەکی یاسایی بەرامبەرکردوین و  هێرشی کردوەتە سەرمان، کە هێرشەکانیش بەپێی داتاکانمان دورن لە راستیەوە، هەربۆیە پەنامان بردوەتەبەر دادگا چارەسەری بکات."