رادیۆی دەنگ

 

له‌سه‌ر روبه‌رى زیاتر له‌ 30 دۆنم زه‌وى دوكانى گه‌نم فرۆشه‌كانى ناوبازارى كه‌لار له‌ ناوچه‌ى پیشه‌سازیی قه‌زاكه‌ دروست ده‌كرێته‌وه‌، سه‌رۆکی شاره‌وانیش ده‌ڵێت: ‌ %90ـی خزمه‌تگوزارییه‌كانمان ته‌واو كردوه‌.

 

ئه‌كره‌م ساڵح، سه‌رۆكى شاره‌وانى كه‌لار، بۆ رادیۆى ده‌نگ باسى له‌وه‌كرد: لەناوچەی پیشەسازیی کەلار روبه‌رى زیاتر له‌ 30 دۆنم زه‌ویمان دەستنیشان کردوە بۆ دروستکردنی دوکان بۆ ئەو هاوڵاتییانەی دوکانیان لە بازاڕی گەنم فرۆشان هەبوە، ئەمەش دوای بڕیاری تێکدانی ئەو دوکانانە.

 

رونیکردەوە: بازاڕە تازەکە خۆى له‌ 262 دوكان ده‌بینێته‌وه‌ كه‌ هه‌ر دوكانێكى روبەرەکەی 8 به‌ 5 مه‌تره‌.

 

بەوتەی خۆیشی له‌ ئێستادا له‌ دیراسه‌كردنى ئەوەدان دیزانى ئه‌و دوكانانە چۆن بێت، ‌چونکە دەبێت خاوەن دوکانەکان خۆیان دوکانەکان دروستبکەن، بەڵام لەژێر سەرپەرشتی ئەواندا، هاوکات خزمەتگوزارییەکانی دوکانەکان شارەوانی دەیکات.

 

لەوبارەوە رونیکردەوە: خزمه‌تگوزارییه‌كان بە رێژەی 90% تەواو بون، زیاتر له‌ 3 مانگه‌ سه‌رقاڵى رێكکردنه‌وه‌ى زه‌ویه‌كه‌ین و ئاوه‌ڕۆمان بۆ كردوه‌ و ئێستاش ئاوى خواردنه‌وه‌ بۆ دوكانه‌كان راده‌كێشین، ئه‌وه‌ى ماوه‌ته‌وه‌ كۆنكریتكردنى كۆڵانه‌كانه‌، بۆ ئەوەی دواتر دەست بە دروستکردنی دوکانەکان بکرێت.

 

سەرۆکی شارەوانی کەلار باسی لەوەشکرد: دوکاندارەکان دەتوانن لە شوێنی ئێستایان بەردەوام بن لە ناوبازاڕی کەلار،  هەتا دوکانەکانیان لە شوێنە تازەکەدا دروستدەکرێت و دواتر دەگوێزرێنەوە.