رادیۆی دەنگ

 

شارەوانی کفری بەتۆمەتی ناوزڕاندن سکاڵا لەسەر رۆژنامەنوس: محەمەد عەدنان تۆماردەکات و دوای بانگهێشتکردنی بۆ دادگا بە کەفالەت ئازاد دەکرێت.

 

محەمەد عەدنان، بە رادیۆی دەنگی وت: لەسەر بڵاوکردنەوەی 2 پۆست لە هەژماری خۆم لە فەیسبوک، سەرۆکی شارەوانی کفری سکاڵای لەسەر تۆمارکردوم.

 

وتیشی: سکاڵاکە بە یاسای خراپ بەکارهينانی ئامێرەکانی پەیوەندییکردن تۆمارکراوە و ئەمڕۆش من چومە بەردەم دادوەر و وتەم لێوەرگیرا.

 

باسی لەوەشکرد ئەو پۆستانەی کردویەتی پەیوەندیی هەیە بە 2 بابەتی پەیوەندیدار بە خەمی گشتییەوە، یەکەمیان تایبەتە بە پێویستی قەرەبوکردنەوەی خاوەن زەوییەکانی کەرتی تلیشان، دوەمیشیان لەبارەی دروستکردنی شەقامی تەنیشت کۆمیتەی کفرییەوە هەیە.

 

لەبەرامبەریشدا سەرۆکی شارەوانی کفری باس لەوەدەکات: رۆژنامەنوسەکە چەندینجار پۆستی لەسەر کردون.

 

عەلی خورشید، بۆ رادیۆی دەنگ وتی: ئەو رۆژنامەنوسە لە تۆڕی کۆمەڵایەتی فەیسبوک پۆستی لەسەرمان کردوە و قسەی کردوە، بۆیە ئێمەش پەنامان بۆ دادگا بردوە.

 

وتیشی: ئەمڕۆ دوای چونی بۆ بەردەم دادوەر، بە کەفالەت ئازاد کراوە.

 

رۆژنامەنوس: محەمەد عەدنان، پەیامنێری کەناڵی NRTـیە لە سنوری قەزای کفری.