مەلا ئیدریس ژاڵەیی*

 

بێگومان گەورەترین ناز و نیعمەت، سەلامەتی و ئارامی و ئاسایشە، بەداخەوە لەم سەردەمەدا یەکێک لە لەناوبەرەکانی ئەم نیعمەتانە، کوشتارگەی روداوەکانی هاتوچۆیە کە  رۆژانە دەبێتە هۆی مردن و کەمئەندامبون و کەوتنە ناوجێگەی ساڵانی تەمەن و تێکچونی شیرازەی ماڵ و خێزان و کۆمەڵگە!

 

لێخوڕینی ئۆتۆمبێل بە نەخۆشی و بێهۆشی و سەرخۆشی و خۆسەرقاڵکردن بە کاری لابەلا و تەلەفۆن و چات و وێنەگرتن و ڤیدیۆ تۆمارکردن و تیژڕەوی و پابەند نەبون بە رێنماییەکان و یاساکانی هاتوچۆ، هەمو ئەمانە و خراپی رێگەوبانەکان و هێنانی بێبەرنامەی ئۆتۆمبێلی زۆر و بۆر و بێسەرەتا و کەموکورتی لە سیستمه‌ی مۆڵەتپێدانی شۆفێری، له‌پاڵ خراپی رێگاوبانه‌كان و گوێپێنه‌دان به‌ كوالێتى و گونجاوییان، لە هۆکارە سەرەکیەکانی ئەم کوشتوبڕەی روداوەکانی هاتوچۆن.

 

بە پێی رێنماییەکانی ئیسلام، موسڵمان  بەرپرسە لە پارێزگاری لە ژیانی خۆی و ژیان و سەروماڵی  کەسانی تریش، وەک لە فەرمودەی پێغەمبەر (صلى الله عليه وسلم)ـدا  هاتوە و دەفەرموێت: "لا ضرر ولا ضرار".

 

ئەو شۆفێرەی کەمتەرخەم و سەرەڕۆیە و گوێ بەیاسا و رێساکانی هاتوچۆ نادات، ئەوە  پێچەوانەی پەیامەکانی ئیسلامە لەم بوارەدا و گوناهبارە و وەک بکوژی دەستئەنقەست  (قاتل متعمد) وایە، ئەگەر سەرەنجامی تیژڕەوی و پابەندنەبونەکەی بزانێت.

 

پێویستە هەمومان بزانین روح و ژیانمان ئەمانەتی خوایە و مافی پارێزگاری لە سەلامەتی رێگاوبانەکان بەرپرسیاریەتی هەمومانە و لەڕۆژی دوایدا لەبارەیانەوە پرسیارمان لێدەکرێت.

 

خۆپارێزیی و سەلامەتی لە روداوە دڵتەزێنەکانی رێگاوبانەکان و رێزگرتنی هێماکانی هاتوچۆ و  شۆفێریکردن بە وریایی و ئاگابون و تیژڕەوینەکردن، ئەرک و واجبێکی شەرعی و ئەخلاقیە، هەروەها ئەرکی سەرشانی هەمومانە ئامۆژگاری کەسانی تر بکەین بە رێزگرتنی رێگاوبانەکان و بون بە پێشەنگ بۆ کوڕ و کچەکانمان بە پابەندبون بە یاساکانی هاتوچۆ و لێپرسراوێتی رێگاوبانەکان.

 

ئەمانە و پێکهێنانی گروپ و رێکخراو و ئەنجامدانی چالاکی جۆراوجۆر، دیسانەوە ئەرکێکی ئاینی و ئینسانیە بۆ رێگەگرتن لەم روداوە دڵتەزێنانەی کە رۆژانە لە رێگەماندایە.

 

بەهیوای سەلامەتی بۆ هەموان.

 

 

* بەرپرسی لقی گەرمیانی یەکێتی زانایانی ئاینی ئیسلامی کوردستان