دەنگ نێت

 

عەلی حەمەساڵەحی پارلەمانتار رایدەگەیەنێت بڕیاردراوە ھەندێک لە زەویە گرانبەھاکانی کەلار بفرۆشرێت و بە پارەکەی پرۆژەی خزمەتگوزاریی جێبەجێ بکرێت.

 

ئەو پارلەمانتارە لە پەڕەی خۆی لە فەیسبوک نوسیویەتی: لەماوەی ڕابردودا پێشنیارمان بۆ جێگری سەرۆکی حکومەت کرد چەند زەویەکی نایاب لە کەلار ھەیە، لە بری ئەوەی بەناڕەوا بدرێتە چەند کەسێک، بە کێبرکێ و بەپێی ماستەرپلانێکی شایستە بفرۆشرێت و پارەکەی بۆ خزمەتگوزاری ناوچەکە بێت.

 

باسی لەوەکردوە جێگری سەرۆکی حکومەت پێشنیارەکەی پەسەندکردوە و سەرۆکی دیوانی ئەنجومەنی وەزیرانیش بەھەمانشێوە. ھەربۆیە ئەمڕۆ و بە راسپاردنی جێگری سەرۆک وەزیران ھاتوەتە کەلار و لەگەڵ سەرپەرشتاری ئیدارەی گەرمیان و بەڕێوبەرەکان و نوێنەری جێگری سەرۆکی حکومەت کۆبونەتەوە.

 

بەوتەی خۆی 'بڕیارە پلانێکی تەواو بۆ دیاریکردنی زەویەکان و میکانیزمی فرۆشتن و خەرجکردنی پارەکەی بۆ خزمەتگوازی دابندرێت'، باس لەوەشدەکات کە بەم ھەنگاوە دەیان ملیۆن دۆلار بۆ گەرمیان تەرخاندەکرێت.