دەنگ نێت

 

دەنگۆی ئازادکردنی ٣ تۆمەتباری روداوی ھێرشکردنە سەر پارلەمانتار غالب محەمەد بڵاو دەبێتەوە بە فشاری پارتی، پارلەمانتارێکیش دەڵێت: "هاوکاری تاوانباران بەشدارییە لە تاوان خۆیدا".

 

سایتی درەو میدیا، لە ھەواڵێکدا ئاماژەی بەوەکردوە ٣ پلەداری سەر بە پارتی کە بە تۆمەتی ھاوکارییکردن و ئاسانکارییکردن بۆ ھەڵھاتنی ئەنجامدەری روداوی ھێرشکردنە سەر پارلەمانتار غالب محەمەد تۆمەتبار کرابون و لە سلێمانی راگیرابون، ئەمڕۆ ئازاد کراون.

 

ئاماژەی بەوەشکردوە کە ئازادکردنەکە بە فشاری مەسعود بارزانی سەرۆکی پارتی بوە.

 

لایخۆشیەوە ھۆشیار عەبدوڵڵا، ئەندامی پارلەمانی عێراوی لە لیستی گۆڕان و ھاوپەیمانی ھیوا، لە ھەژماری خۆی لە فەیسبوک، سەرکۆنەی ئەو کارە دەکات.

 

دەڵێت: یەکێتی و سەرۆکایەتیەکەی، تیمە حکومیەکەی، دەزگا ئەمنیەکانیی  بەرپرسیارن لەوەی ڕاشکاوانە بە رایگشتی خەڵکی کوردستان بە گشتی و سلێمانی بە تایبەتی بڵێن لە پەیوەست بە دەستگیرکردنیی ئەو سێ کەسە و ئازادکردنیان رونکردنەوە بدەن.

 

دەشڵێت: دۆسێی د.غالب هێندە ئاسان و بچوک نیە بە یەکێتی و پارتی یا کەسێک و دوان دیزە بەدەرخۆنە بکرێ.

 

ھۆشدارییش دەدات لە "هەر هەوڵێک بۆ بەلارێدابردنیی لێکۆڵینەوەکان".

 

ئێوارەی 28-2 ، د. غالب محەمەد عەلی، پارلەمانتاری کورد لە ئەنجومەنی نوێنەرانی عێراق لەسەر لیستی بزوتنەوەی گۆڕان و ھاوپەیمانی ھیوا، لە بەردەم ماڵەکەی خۆیدا بە چەقۆ و بۆکسی ئاسنین لەلایەن کەسێکەوە ھێرشی کرایە سەر و بریندارکرا، دواتر ئاشکرا بو کە ھێرشکەرەکە بە (حامیدە سور) بەناوبانگە و پێشتر لە ھێزە ئەمنیەکانی سەر بە پارتی کاریکردوە. دواتر راگەیەنرا کە ماڵەکەیان پشکنراوە، بەڵام توانیویەتی ھەڵبێت و گومانەکان بۆ ئەوە دەچن کە بەرەو ھەولێر و ناوچەکانی ژێر دەسەڵاتی پارتی چوبێت.