ده‌نگ نێت

 

به‌ فه‌رمانى دادوه‌رى لێكۆڵینه‌وه‌ى ده‌ستپاكی گه‌رمیان، به‌ڕێوبه‌رى تۆمارى خانوبه‌ره‌ى گه‌رمیان "تاپۆ" و فه‌رمانبه‌رێكى دیكه‌ى هه‌مان فه‌رمانگه‌ راده‌گیرێن.

 

سه‌رچاوه‌یه‌كى ئاگادار به‌ رادیۆی ده‌نگى وت: به‌ڕێوبه‌رى تۆمارى خانوبه‌ره‌ى گه‌رمیان "تاپۆ" و فه‌رمانبه‌رێكى دیكه‌، به‌ فه‌رمانى دادوه‌رى لێكۆڵینه‌وه‌ى ده‌ستپاكی گه‌رمیان، بڕیاری راگرتنیان بۆ ده‌رچوه‌ و له‌ گرتن و گواستنه‌وه‌ى گه‌رمیان راگیراون.

 

رونیشیكرده‌وه‌: راگرتنه‌كه‌ به‌پێی ماده‌ى (339)ـه‌ له‌ یاسای سزادانى عێراقی، كه‌ ئه‌و ماده‌یه‌ تایبه‌ته‌ به‌ سزادانى فه‌رمانبه‌ر له‌كاتى به‌كارهێنان و مامه‌ڵه‌كردن به‌ داهات و كرێ به‌ناشایسته‌یی و زیاتر له‌وه‌ى بۆی دیارییكراوه‌.

 

رادیۆی ده‌نگ له‌مباره‌یه‌وه‌ په‌یوه‌ندی به‌ وته‌بێژی پۆلیسی گه‌رمیانه‌وه‌ كرد، به‌ڵام په‌یوه‌ندیه‌كه‌ى به‌رده‌ست نه‌بو.

 

لایخۆشیه‌وه‌ سه‌رچاوه‌یه‌كى ئاگادار به‌ رادیۆی ده‌نگى وت: هۆكارى ئه‌و راگرتنه‌ بۆ ئه‌وه‌ ده‌گه‌ڕێته‌وه‌ كه‌ تۆمه‌تبار كراون به‌سه‌رپێچی یاسایی.

 

رونیشیكرده‌وه‌: یه‌كێك له‌ جۆره‌كانى رایكردنى مامه‌ڵه‌ پێی ده‌وترێت دانپێدانانى ناوخۆیی "أقرار داخلی" واتا هاوڵاتیه‌كه‌ بۆ رایكردنى مامه‌ڵه‌ى تاپۆكردن خۆی دێته‌ فه‌رمانگه‌كه‌، ئه‌وه‌شى كه‌نه‌توانێت بێته‌ فه‌رمانگه‌ به‌هۆكارى نه‌خۆشی و ته‌مه‌ن، ئه‌وا فه‌رمانبه‌رێكى فه‌رمانگه‌ى تاپۆ خۆی ده‌چێته‌ ماڵه‌وه‌ بۆ لای ئه‌و كه‌سه‌ و دانپێدانانه‌كه‌ى بۆ ئه‌نجام ده‌دات كه‌ له‌م حاڵه‌ته‌دا به‌ دانپێدانانى ده‌ره‌كى "أقرار خارجی" ناوده‌برێت و له‌به‌رامبه‌ردا به‌ پسوڵه‌ بڕه‌ پاره‌یه‌ك له‌ هاوڵاتیه‌كه‌ وه‌رده‌گیرێت.

 

ئاماژه‌ى به‌وه‌شدا راگیراوانى فه‌رمانگه‌ى تاپۆ تۆمه‌تبار كراون به‌وه‌ى چه‌ند حاڵه‌تێكى دانپێدانانى ناوخۆییان به‌ دانپێدانانى ده‌ره‌كی هه‌ژمار كردوه‌ و له‌به‌رامبه‌ردا پاره‌ له‌ هاوڵاتیان وه‌رگیراوه‌، هه‌ربۆیه‌ دادگا دۆسیه‌ى بۆ كردونه‌ته‌وه‌ و تۆمه‌تبارى كردون.

 

باسی له‌وه‌شكرد دۆسیه‌كه‌ هێشتا له‌ژێر لێكۆڵینه‌وه‌دایه‌ و دادوه‌ر لێكۆڵینه‌وه‌ى زیاتری تێدا ده‌كات.