ده‌نگ نێت

 

هاوڕێیه‌كى یه‌كێك له‌ شه‌هیدانى خۆپیشاندانه‌كانى ئه‌م دواییه‌ى كفری ئاشكراى ده‌كات كه‌ دواى هه‌ڵواسینی وێنه‌ى دو شه‌هیده‌كه‌ له‌ناو شاری كفری، قایمقامى شاره‌كه‌ "هه‌ڕه‌شه"‌ و "فشاری" كردوه‌ و وێنه‌كان لابراون.

 

هیوا ره‌شید، هاوڕێی (ئاكۆ سه‌لمان) شه‌هیدی خۆپیشاندانه‌كانى كفری، به‌ رادیۆی ده‌نگى وت: پاش ئه‌وه‌ى وێنه‌ى هه‌ردو شه‌هیدی خۆپیشاندانه‌كانى ئه‌م دواییه‌ى كفریان له‌ناو شاره‌كه‌دا هه‌ڵواسیوه‌، قایمقامى كفری په‌یوه‌ندی به‌ خۆی و كه‌سوكارى یه‌كێك له‌ شه‌هیده‌كانه‌وه‌ كردوه‌ و داوای كردوه‌ ده‌ستبه‌جێ وێنه‌كان لابده‌ن.

 

وتیشی: قایمقام پێی وتین ئه‌گه‌ر ده‌ستبه‌جێ لای نه‌به‌ن، ئه‌وا خۆمان وێنه‌كان لاده‌به‌ین و ئیجرائاتیشتان به‌رامبه‌ر ده‌گرینه‌به‌ر.

 

هیوا ره‌شید، ئاماژه‌ى به‌وه‌شكرد كه‌ له‌دانانى وێنه‌كاندا پرسیان به‌ شاره‌وانى كفری كردوه‌ و لارییان نه‌بوه‌.

 

وتیشی: دواى ئه‌و په‌یوه‌ندیانه‌ى قایمقام وێنه‌كان لابراون.

 

رادیۆی ده‌نگ بۆ وه‌رگرتنى قسه‌ى ئه‌وان و تۆمه‌تباركردنیان له‌مباره‌یه‌وه‌، چه‌ند جارێك په‌یوه‌ندی به‌ سیروان شكور، قایمقامى كفری به‌وه‌كاله‌ته‌وه‌ كرد، به‌ڵام وه‌ڵامى په‌یوه‌ندیه‌كانى نه‌دایه‌وه‌.

 

ئێواره‌ى (7/12/2020) له‌ قه‌زاى كفری خۆپیشاندان ئه‌نجام درا و له‌ نزیك كۆمیته‌ى راپه‌ڕینی سه‌ر به‌ یه‌كێتى گه‌نجێك به‌ناوى (ئاكۆ سه‌لمان) شه‌هید كرا، ئێواره‌ى رۆژی (11/12/2020) و له‌ خۆپیشاندانێكى دیكه‌دا، گه‌نجێك به‌ناوى (شڤان محه‌مه‌د) له‌ نزیك بازاڕ و ناوچه‌ى پارتى شه‌هید كرا.