رادیۆی ده‌نگ

 

یه‌كه‌ى چاودێریی حكومه‌تى خۆجێى گه‌رمیان به‌ پاڵپشتی رێكخراوى هاوكاری ئه‌ڵمانى، وۆركشۆپێكى بۆ ژماره‌یه‌ك چالاكوان رێكخست، له‌باره‌ى داڕشتنى پلان و ستراتیژى رێكخراوه‌یى  یان گروپى مه‌ده‌نى.

 

راهێنانه‌كه‌ ئه‌مڕۆ شه‌مه‌ (12/10/2024) له‌ هۆڵى سوڵتان له‌كه‌لار به‌ به‌شداریی 21 چالاكوان و به‌ڕێوبه‌ر و نوێنه‌رى رێكخراو و گروپه‌ مه‌ده‌نییه‌كان به‌ڕێوه‌چو، تیایدا به‌ شێوه‌ی تیۆریی و پراكتیكی به‌شداران ئاشناكران به‌ بنه‌ماكانى ئاماده‌كردن و داڕشتنى پلان و ستراتیژی كاركردنى گروپ و رێكخراوه‌ مه‌ده‌نییه‌كان.

 

زریان محه‌مه‌د، ئه‌ندامى یه‌كه‌ى چاودێریی حكومه‌تى خۆجێی گه‌رمیان، له‌وباره‌وه‌ رایگه‌یاند: ئامانج له‌ چالاكییه‌كه‌ پته‌وكردنى كارى كۆمه‌ڵی مه‌ده‌نی و رێكخراو و گروپه‌ مه‌ده‌نییه‌كانه‌ له‌ گه‌رمیان، بۆ ئه‌وه‌ى به‌شێوه‌یه‌كى پیشه‌ییانه‌ و تۆكمه‌ بتوانن كار بكه‌ن و رۆڵیان هه‌بێت له‌ بره‌ودان به‌ ژیانى مه‌ده‌نی له‌ ناوچه‌كه‌دا.

 

یه‌كه‌ى چاودێریی حكومه‌تى خۆجێی گه‌رمیان، پرۆژه‌یه‌كى رادیۆی ده‌نگه‌ كه‌ كار له‌سه‌ر به‌دواداچون بۆ پرسی چاودێریی و لێپرسرینه‌وه‌ى حكومه‌ت له‌لایه‌ن كۆمه‌ڵی مه‌ده‌نی ده‌كات و له‌ساڵی 2017ـه‌وه‌ دامه‌زراوه‌.