رادیۆی ده‌نگ

 

یه‌كه‌ى چاودێری حكومه‌تى خۆجێی گه‌رمیان، سه‌باره‌ت به‌ پرسی چاودێریی بازاڕ، گفتوگۆیه‌كى له‌نێوان ژماره‌یه‌ك چالاكوان و رۆژنامه‌نوس و هاوڵاتی و كاسبكار و به‌رپرسانى حكومه‌ت به‌ڕێوه‌برد.

 

له‌ گفتوگۆكه‌دا سه‌ره‌تا هه‌ریه‌كه‌ له‌ به‌ڕێوبه‌رى به‌ڕێوبه‌رایه‌تى چاودێریی بازرگانى گه‌رمیان، به‌ڕێوبه‌رى به‌ڕێوبه‌رایه‌تى ڤێتێرنه‌رى گه‌رمیان و لێپرسراوى به‌شى چاودێری و سه‌لامه‌تى خۆراك له‌ به‌ڕێوبه‌رایه‌تى خۆپاراستنى ته‌ندروستى گه‌رمیان، كورته‌یه‌كیان له‌باره‌ى ئه‌رك و كاره‌كانى ئه‌وان له‌ چاودێرییكردنى بازاڕ له‌ روى كوالێتى و نرخی كاڵا و پاكوخاوێنى و سه‌لامه‌تى خۆراك و گۆشت و هاوشێوه‌كانى خسته‌ڕو.

 

پاشان به‌شداران هه‌ریه‌كه‌ و سه‌رنج و بۆچونه‌كانى خۆیان له‌سه‌ر پرۆسه‌ى چاودێریی بازاڕ خسته‌ڕو، له‌وباره‌شه‌وه‌ ژماره‌یه‌ك پرسیاریان ئاراسته‌ى به‌رپرسه‌ حكومیه‌كان كرد و ئه‌وانیش وه‌ڵامیان دایه‌وه‌.

 

هه‌روه‌ك گفتوگۆ له‌نێوان به‌شداران و به‌رپرسه‌ حكومیه‌كان له‌سه‌ر كارى لیژنه‌كان و چاودێرییكردنى بازاڕ هاته‌ ئاراوه‌ و ژماره‌یه‌ك پێشنیاز و راسپارده‌ش خرانه‌ڕو.

 

یه‌كه‌ى چاودێری حكومه‌تى خۆجێی گه‌رمیان، پرۆژه‌یه‌كى رادیۆی ده‌نگه‌ به‌ پاڵپشتى سندوقی نیشتمانى بۆ دیموكراسی (NED)، كه‌ مانگانه‌ راپۆرتێكى به‌دواداچون له‌باره‌ى پرسێكى په‌یوه‌ندیدار به‌ حكومه‌ته‌وه‌ بڵاوده‌كاته‌وه‌، هه‌روه‌ك كۆبونه‌وه‌ و گفتوگۆی كراوه‌ و كنفرانسیش له‌نێوان كۆمه‌ڵی مه‌ده‌نى و هاوڵاتیان و حكومه‌تدا ئه‌نجام ده‌دات، به‌ ئامانجى دروستكردنى لێكتێگه‌یشتنێكى باشتر.

 

پێشتریش یه‌كه‌كه‌ دو راپۆرتى له‌باره‌ى كارى لیژنه‌كانى چاودێریی و نرخی كاڵا و شمه‌ك له‌ بازاڕ و رۆڵی حكومه‌ت له‌ دیارییكردنى ئاماده‌ و بڵاو كردوه‌ته‌وه‌.